Ki Cooperative Society ki don ka bynta kaba kongsan ban wanrah jingkylla

Syllad | The Rising MeghalayaNovember 16, 2021

Ki Cooperative Society ki don ka bynta kaba kongsan ban wanrah iaka jingkylla haka roi ka par bad ban pyndap iaka bam ka dih bad kumjuh iaka lad iohkam iohjam, la ong ka Kong DD Syngai Additional Deputy Commissioner, West Jaintia Hills District.

“Ki Cooperative Society ki la wanrah ka jingkylla ha kiba bun ki liang bad lada peit haka ri baroh kawei bun ki Cooperative Society kum ka Amul ka la kiew bha, hynrei wat la kata ymdei pat ban klet ïaki Cooperative Society kiba hapoh ka district kiba wanrah ka jingkylla haka imlang sahlang haki rukom bapher bapher,” la ong ka Kong DD Syngai haba kren kum ka kongsan haka jingrakhe iaka 68^th All India Cooperative Week.

Ia kane ka Cooperative Week la rakhe da ka jingkyrshan pisa ka RCS Shillong haka jingiatreilang ka bad ka Meghalaya Cooperative Apex Bank Ltd ha ïingdorbar ka Lion Mission Compound Dorbar Shnong Hall, Jowai. Iaka jingialang la pyniaid u  Bah JM Paswet JCO-ARCS bad u Assistant Registrar of Cooperative Societies, Jowai u R. Chakraborty uba la ai iaka jingkren pdiang haka jingjiadonlang kiwei kiwei ki ophisar ka tnad Cooperative.

Kala kyntu iaka tnad Cooperative Society ban pynsngewthuh paidbah iaki skhim bad ki lad jingiarap ki bank khnang ban pynshlur shuh shuh iaki nongshong shnong bad ki samla ban seng iaki cooperative bad ban ieng hala ki jong ki kjat.

Ka Branch Manager MCAB Ltd, Jowai Branch ka Kong O Lato kala ong ba ka MCAB kadei ka bank kaba kyrshan iaki nongrep bad nongri jingri bad pynshlur iaki cooperative society ban kynsew pisa haka bank bad ban shim iaka ram KCC Loan.