Ki dei ki nongtrei bylla, ki don pat ka mynsiem ban ai ban iakhun khlam COVID-19

Syllad | The Rising MeghalayaMay 20, 2020

Ki dei ki nongtrei bylla bad kiba trei haka kyrdan kaba rit hapoh ki tnad sorkar da kaba ai iaki jing shakri ha kaban pynkhuid bad maramot iaki lynti ki syngkieng haki shnong bapher bapher, ban shet ja sngi bad kiwei kiwei ki kam, hynrei kine ki nongtrei bylla wat la ka jingioh jong ki kadei kaba shitroh, hynrei ki don pat ka mynsiem ban ai bad kila pyni ka nuksa kaba bha tam kaba kiwei ki dei ban bud, khamtam kiba dap biang haka ioh ka kot ban don ka mynsiem ban ai bad ban iarap ia ka sorkar ne ka synjuk kiba trei iaki kam ne shakri ban iarap ia kiba duk kiba rangli ban pynbha iaka imlang ka sahlang ha ka por ka khim ka khait.

Kine ki nongtrei btylla ki dei ki muster roll bad ki nongshet ja sngi ki khynnah skul kiba hap hapoh ka lama jong ka All Jaintia Muster Roll Workers & Labour Union (AJMRWLU). Kane ka synjuk ki nongtrei bylla, wat la ym thikna ka jingioh bai bylla sngi jong ki, hynrei kila pynpaw sha ka pyrthei ba ki don ka mynsiem ban ai bad kila synniang da ka pisa ban kyrshan ïaka sorkar haka jingiakhun pyrshah iaka khlam COVID-19.

Ka AJMRWLU kaba don haduh 5300 ngut ki dkhot kaba kynthup 2300 ngut ki muster roll bad 3000 ngut ki nongshet ja sngi ki khynnah na East bad West Jaiñtia Hillls bad kila shim ka sien jam ban ia kynshew pisa para maki ban synniang pisa haduh T.20 hajar sha ka Chief Minister’s Relief Fund (CMRF) for COVID-19.

Ïa kane ka pisa ka AJMRWLU, hapoh ka jingialam u K. L Pariat President AJMRWLU ha ryngkat ka Kong M. Bareh General Secretary, ka Kong L. Kyndiah treasurer AJMRWLU bad ka Kong B. Dhar General Secretary ka tnad AJMRWLU na East Jaiñtia Hills District kala aiti ha u Deputy Commissioner ka West Jaintia Hills District u Garod. LSN. Dykes ha kamra treikam jong u haka sngi ba Ar

Shuh shuh ka synjuk ki muster roll wat la ki dei ki nongtrei bylla kiba rit tam hapoh ki tnad sorkar, kila lah ruh ban kyrshan mar bam iaki nongshong shnong ha ki ba bun tylli ki shnong ha West Jaintia Hills da ka jingiatreilang bad ka Shiv Mandir Committee, Jowai.

Kumban shu pynkynmaw kane ka synjuk naka por sha ka por kala mih sha khmat ban buh ki jingdawa ha khmat ka sorkar Jylla ban ithuh iaki nongtrei muster roll kila la trei slem ne palat iaka 10, ban pynthikna ka jingioh bai bylla kaba manla u bnai, ban ai shuti iaki longkmie kiba trei muster roll haba pung khun bad kiwei kiwei.

Katba iaki nongtrei mid day meal ruh la dawa ban kyntiew iaka ba bylla (honorarium) kaba T.1000 sha ka 5000/- bad ban ai ka tulop kaba shisnem kata 12 bnai haka jaka jong ka 10 bnai. Nalor ban ai shuti haba pang ba shitom bad ka shuti kha khun namar ba kane ka kam shet ja khynnah skul, kiba bun hi dei lki longkmie kiaba trei ia kane ka kam.