Ki doktor kim nud sumar briew ha Mawryngkneng PHC ong ka synjuk ki sordar 6 shnong

Syllad | The Rising MeghalayaAugust 19, 2020

Ki doktor kiba don ha jaka sumar ha Mawryngkneng PHC kim nud shuh ban sumar briew namar bym don ki tiar ki tar iada na ka khlam COVID-19 la ong ka synjuk ki sordar 6 shnong kiba la sdang ban iakhih da kaba rah placard ban dawa na ka sorkar ban pynkynriah iaka PHC Mawryngkneng sha ka building kaba thymmai mynta ka sngi Balang.

Kane ka synjuk ki sordar 6 shnong ka kynthup iaka shnong Mawryngkneng, Kut, Puriang, Pommura, Thangshalai bad Ksehpyndeng.

U Bah Peter J Lawai, Sordar Shnong Mawryngkneng uba long ruh u chairman ka synjuk ki sordar 6 shnong, ula iathuh “Ka Mawryngkneng PHC wat la ka Jylla kala shah ktah haka khlam COVID-19, haduh mynta kam shym la ioh ki tiar iada iaki doktor bad ki nongtrei ka PHC wat la ki dei ki briew kiba khmat ban sumar iaki briew kiba pang ba shitom. Mynta kane ka jaka sumar khlem jurip ia kiba pang ba shitom kala ai dawai iaki nongpang ba wan shim dawai.”

U Bah Lawai ula iathuh ba ki pynlong iaka jingiakhih namar ba kuman ka sorkar ban pynioh iaka jingdawa jong ki kata ban pynkynriah iaka PHC Mawryngkneng barim sha kaba thymmai nalor ban pynbiang iaki jingdonkam ka jaka sumar naduh ka kali kit nongpang bad ka bording haka jaka sumar.

Ula ong ka sorkar lyngba u DHS ka tnad ka koit ka khiah u Dr. Aman War kala kular ban pynkynriah noh ia kane ka jaka sumar sha kaba building thymmai naduh u bnai Jylliew 12 tarik. Ha kane ka jingialang kaba long ha PHC la nalor ki sordar shnong la iadonlang ruh ki MDC, MLA ka thain bad DMHO.

U Director jong ka Health Services u Dr. A. War ula kular ba hapoh u bnai Naitung yn pynkynriah noh ïaka PHC barim shaka Building kaba thymmai, hynrei wat hadien ba ka synjuk kala pynkynmaw biang haka 6 tarik Naitung kam don kino kino ki dak ki shin bad ka tnad ka khoit ka khiah kala leh bymsuidniew ia kane ka jingdawa ki 6 shnong wat ha kum kane ka por ka saw ka sain na ka jingiakhun iaka khlam COVID-19, ong u bah Lawai.

“Dei namar kane ka jingleh mynthi ka sorkar ki sordar jong ki 6 shnong kila pynlong iaka jingiakhih da kaba shong ha khmat ka phyllaw ka PHC bad haka 24 tarik une u bnai pat yn sa mih sa ki dkhot executive committee jong ka Mawryngkneng.

Lada ka jingdawa jong ngi kam urlong ngin sa shim da kiwei pat ki rai kiba kham tyngeh,” ong u bah Lawai.