Ki Dolloi ki dei ki nong pynneh pynsah ïaka Riti Dustur: Winning

Syllad | The Rising MeghalayaNovember 28, 2019

JOWAI: U Ma Winning Garland Sungoh MDC jong ka Mowkaiaw bad u Executive Member jong ka Jaintia Hills Autonomous District Coluncil (JHADC) ula ong “ki Dolloi kiba dei ki khlieh jong ka elaka ki don ka bynta kaba kongsan ban pynneh pynsah ïaka Riti ka Dustur jong ki Elaka bapher bapher ha Rilum Jaiñtia, kaba riewspah bha haka kolshor bad ka jinglong tynrai.”

“Ki Dolloi kidei ban wanrah haka jingthoh ïaka Riti Dustur bad ban pynpoi sha ka Konsil khnang ba ngin lah ban shna aiñ halor ka Riti ka Dustur jong ka jaidbynriew,” la ong u ma Winning haba kren haka jingïalang Cultural Programme jong ka Kopati Puja jong ka Raid Raliang kaba la poi sha kaba kut haka 2 baje mynstep haka 27 tarik une u bnai Naiwieng ha Raliang.

La pynkut iaka jinglehniam da ka Pynshad Dolloi bad Pynnguh Dolloi.

U Ma Winning ula ong shuh shuh ba “Ka konsil ka don ïaka committee Customary Law, hynrei kane ka committee ka shu shong namar ba haduh mynta ym pat don ki Dolloi kiban pynpoi da ki jingthoh sha ka konsil ban ngin lah ban shna aiñ halor ka Riti ka Dustur.” Ula ban jur ïaki Dolloi ban shimkhia ban lum ïaki jingïalang dorbar elaka ban buh da ki jingthoh halor ka riti dustur jong ki shong hala ki elaka bapher bapher khnang ba ynda lah ban pynlong aiñ kan pynsuk lada kiwei pat ki bor ne ki jaidbynriew ki thmu ban shimkabu ne thombor.

Ha kane ka prorkam la ïadonlang u MLA ka thain uba long u Myntri jong ka Sorkar Jylla u ma Coming One Ymbon, u Syiem Khyrim Balajied Singh Syiem, ki nongïalam ka Seinraij Jowai. ki Dolloi na kiwei kiwei ki Elaka.

Ka Kopati Puja kadei ka puja kaba pyndep da ka Raid Raliang manla u snem bad ha kane ka sien la lah ban pynlong hadien 3 snem bala hap pynpep ïaka bad la hap ban knia haduh lai tylli ki Blang.

Ïa kane ka niam la ngeit ba la ju pyndep da ki mynbarim hadien ka jingjop thma bad ban ainguh ïaki blei ki syiem kiba ïada ïaka raid na ka khlam bad ki jingsniew jingsmeh ka imlang ka sahlang baroh shi snem lynter, la ong u Dolloi ka Elaka Raliang u ma Chawas Lyngdoh.

Kane ka Lehniam Kopati Puja (Noh Blai) kala sdang naduh 23 tarik da ka Sap Khoo Spah” bad ka sngi bakhraw jong kane ka Puja kadei haka Musiang kaba une u snem ka hap haka 26 Naiwieng kaba la sdang ïaka lehniam jing pomblang, ka stad pastieh hapoh Khloo Blai.

Ka jingleh niam Noh Blai la pyndep da u Wamon, Wasan bad kiwei kiwei ki paidbah kiba lah ban shimbynta ki dei tang ki rangbah shynrang kiba la hiar sha wah Ummurem ban pyntuid ïaka Syntu Blai bad pyllait ruh artylli ki paro.

Hadien pat haka por nohphai sngi la don ka Shad Kolshor ha madan Umphula kiba la ïashimbynta da ki senraij bapher bapher ha katei ka jaka kiba ha ki jingriam tynrai kila ai iaki jingrwai bad jingshad tynrai. Haba la kut ka prorkam Cultural Programme la don biang ka jingshad pastied ha Madan Phyllaw Iing u Sohblai.

Shuwa kane la don ka jingle niam Noh Blai ha kaba u Wamon, Wasan bad kiwei kiwei ki paitbah tang ki shynrang kila hiar sha wah Ummurem ban pyntuid ïaka Syntu Blai bad pyllait ruh artylli ki paro.