Ki don 214 ngut kiba mih niang pyrsit haki phra bnai, don ruh kiba kylla matlah

Syllad | The Rising MeghalayaSeptember 27, 2024

Ka State Immunization Officer, Dr Badira Mawlong, haka 26 tarik kala pyntip ba la don 214 ngut kiba mih niang pyrsit bad 11 tylli ki jingwan khie kynsan ka jingpang ha ki 8 bnai, kata naduh u bnai Kyllalyngkot haduh u Nailar mynta u snem.

“Kane ka long kaba sngewkhia bha ia ka jylla jong ngi namar ba bun ki briew ki kyntait ban ai tika pyrshah niang pyrsit,” la ong ka Dr Mawlong haba kren bad ki nongthoh khubor.

“Don kiba ai tika tang iaka sien kaba nyngkong bad ki iehnoh ia ka ba ar. Khamtam ha ka imlang ka sahlang jong ngi, ki ngeit ba u niang pyrsit u dei u niang blei bad ba ngim dei ban pynwit ia ki khun. Hynrei ka jingshisha ka bor met jong ki khun haba mih niang pyrsit ka tlot bad ha kum kine ki por ki ki niang jingpang kin shim kabu ban lynshop ia ki khun bad bunsien, ki khun ki iap na ka jingpang pneumonia, diarrhea bad ka jingpang shitmet,” la ong ka Dr Mawlong.

“Shuh shuh, haba ngi don ki khun kiba don jingpang shitmet bad paw ki dak mong bad ngi donkam ban lum jingtip na ka snam, hynrei ki kmie ki kpa ki kyntait, ki ong ba ngim lah ban pynwit iaki khun, kane ruh ka long ka jingeh kaba khraw,” ka la ong bad bynrap ba namar kane ka jingpang bun ki kylla matlah namar u niang pyrsit.

“Ngi kwah ban kyrpad ia phi baroh ban iarap ia ngi ha kane ka jingpynshai halor ka niang pyrsit. Ngi tip ba ki khot ‘niang blei’ hynrei lada ki ioh tika, kin ym mih niang pyrsit bad lada ki ioh ruh, kin ioh malu mala kaba ym lah ban pyniap ia u khun. Lada u khun u don jingpang shitmet bad mong ruh, lada ki shah ban shim nuksa iaka snam, ngi lah ban tip ba dei u niang pyrsit ne em. Lada dei u niang pyrsit ruh, ki lah ban pdiang ia ka jingai jingsumar,” ka la ong.

Ka Dr Mawlong ka la iathuh ruh ba ki jingkyntait pyrshah ia ka jingai dawai bad tika ki dei na ka daw jong ki jingngeit biej bad jingngeit niam.

“Hynrei don ruh ki briew kiba kyntait khlem da don kano kano ka daw namar ba ki tieng ba kin ioh jingpang shit met hadien ba la dep ai tika,” ka la ong.

U Director jong ka NHM, u Ram Kumar, u la ong ba 90 percent na ki nongshong shnong ki la pdiang ia ka jingai tika.

“Ngi la pynkhlain iaka kam buddien mynta la 1 snem shiteng, kumta la lap ba ka jingdon ka jingpang ruh ka la kiew lai shah na ka 80 tam ha u snem ba la dep sha ka 214 mynta,” u la ong.

“Ngi hap ban pynshai ba ym don kano kano ka jingsangeh ha ka jingai tika. Don ar tylli ki tika. 95% ki lah ban ym ioh ia ka niang pyrsit hadien ba la dep ai tika. Ki jingmong bad ka jingshit met bad kiwei ki dei ban pyntip mardor namar ba ki donkam ban ioh jingsumar mardor,” u la bynrap.