Ki don palat 52,412 ngut ki nongthep vote kiba thymmai ha ka Jylla: CEO

Syllad | The Rising MeghalayaJanuary 7, 2025

Ka jingdon ki nongthep vote ha ka Jylla Meghalaya ka la kiew da 52,412 ngut katkum ka electorall roll haduh 6 tarik u bnai Kyllalyngkot 2025, kata kaba la kyntiew ia ka jingdon jong baroh ki nongthep vote ha ka jylla sha ka 22,69,512 ngut.

U Chief Electoral Officer (CEO) u Dr BDR Tiwari haba kren sha ki lad pathai khubor ha ka 6 tarik Kyllalyngkot u la pyntip ba na  kine ki 22,69,512 ngut ki nongthep vote 11,18,907 ngut ki dei ki shynrang bad 11,50,599 ki kynthei katba 6 ngut ki dei ki Third Gender.

U la pynbna ruh ba la pyndep ia ka Special Summary Revision ha ka 1 tarik u Kyllalyngkot 2025 bad la pyndep ia kane ka kam da kaba bishar bniah bad ka jingpynbeit ryntih kaba kynthup ia baroh ha ka electoral roll.

U pyntip ruh ba ka East Khasi Hills ka dei kaba don bun eh ki nongthep vote, kata 3,20,553 ngut, katba ka South West Khasi Hills ka dei kaba duna tam, kata 38,742 ngut.

Katkum ka electorall roll ki don haduh 72,941 ngut ki nongthep vote kiba ha ka rta 18-19 snem nalor 10,398 ngut ki dei kiba la noh rta bad 11,960 ngut ki briew kiba don jingduna ha ki dkhot met.

Kumjuh ruh ia ki kyrteng jong kumba 8,936 ngut ki nongthep vote kiba la khlad noh la dep ban weng noh na ka electorall roll, bad 7,775 namar ka jingpynkylla jaka bad 385 namar ka jingpynrung kyrteng arsien.

U CEO u pyntip ruh ba mynta la kyntiew ia ka jingdon jong ki polling station sha ka 3551 tylli haba ia nujor bad ka jingpynlong ia ka elekshon sha ka iingdorbar thawain bad elekshon Lok Sabha kaba long 3512 tylli.

Ha kajuh ka por ula ai ka jingiaroh halor ka jingshimkhia jong baroh ki seng sain pyrthei bad ki nongshong shnong na ka bynta ban pynthikna ha kaba iadei bad ka jingiaid beit ha ka jingpynrung kyrteng ia ki nongthep vote.