Ki jingeh ha skulbah NEHU: Thung ka Ministry Education da ka Inquiry Committee ban tohkit halor ki jingkynnoh ia u VC

Syllad | The Rising MeghalayaNovember 14, 2024

Ka Ministry of Education ka Sorkar Pdeng ha ka 14 tarik u Naiwieng ka la thung da ka Inquiry Committee ban pynlong ka jingtohkit halor kiba bun ki jingkynnoh pyrshah ia ki rukom pyniaid kam ba thurmur bad bakla hapoh ka skulbah North Eastern Hill University (NEHU) da u Vice Chancellor.

Kane ka Committee ka kynthup ia u Prof DP Singh, Chairman barim ka University Grant Commission (UGC) kum u Chairman ka Inquiry Committee bad u Prof Dilip Chandra Nath, Vice-Chancellor barim ka Assam University kum u dkhot ka Committee.

Da kaba shimkhia ia ka jingpynsngew jong ki samla pule, ki seng jong ki samla pule bad halor ki jingmih khubor, na ka liang ka Ministry of Education kala thung ia ka Committee jong ki arngut ki dkhot, ki ban pynlong ia ka jingtohkit kaba bniah halor ki jingkynnoh baroh.

Kine ki jingkynnoh ki long halor ka jinghiar arsut ha ka kyrdan jong ka University ha ka National Institutional Ranking Framework (NIRF), namar ka jingpulom ha ka rukom pyniaid ia ki kam jong ka skulbah, ki thungkam beain kaba kynthup ia u Registrar bad ia u Deputy Registrar kaba lam sha ka jinghiar kyrdan jong ka University, ka bym lah pynbiang ia ki jingdonkam ba kongsan ha ka skulbah kynthup ia ki jingtei kaba la ktah ia ka pule puthi bad ka bha ka miat jong ki samla pule bad halor ka jingsngap mynthi jong u VC ia kiba bun ki jingujor bad ia ki dorkhas na ki seng samla pule kynthup halor ka jingdawa ban wanrah ia ki jingkylla kibg donkam.

Ka hukum jong ka Ministry bala soi da u DK Himanshu, Under Secretary ka Sorkar India, kala wan 10 sngi hadien ka jingshah thngan ba khlem pud jong ki samla pule ba la lamkhmat da ka North Eastern Hill University Students Union (NEHUSU) bad ba la kyrshan da ka KSU-NEHU Unit, bad ka jingkhang dam ia ka skulbah ban pyrshah ia ka jingbym bym nang bad ka jingbym lah treikam jong u VC, u Registrar bad Deputy Registrar, kaba la ktah jur ia ka jingtreikam jong ka skulbah NEHU.

Kane ka Committee kan pynlong ia ka jingtohkit halor kawei pa kawei ka jingujor bad ban aiti ia ka kaiphod hapoh ka 15 sngi, kynthup ki jingai jingmut ban lah pynbeit ia kine ki jingeh baroh.

Ka Ministry ka la bthah ruh ia ki bor pyniaid ka NEHU ba kan ai ka jingiatreilang ba pura bad ka Committee bad ban pynbiang ia baroh ki jingdonkam kiba iadei bad ki kot ki sla bad kiwei pat kiba donkam na ka bynta ban pynlong ia kane ka jingtohkit.

Lah ban kdew ba na ka liang ki samla pule kiba pynlong ia ka jingiakhih kila dawa hiar shuki mardor ia u Vice Chancellor bad ruh ban weng kam noh ia u Registrar bad Deputy Registrar