Ki jingkynnoh u Bah Sanbor ia u MP ka long ka bym don nongrim, um ju kren ia lade ha Assembly: Ronnie

Syllad | The Rising MeghalayaFebruary 29, 2024

U nongialam ka Congress Legislature Party (CLP), u Bah Ronnie V Lyngdoh haka 28 tarik Rymphang, u la ong ba ki jingkynnoh jong u MLA ka BJP na South Shillong u Bah Sanbor Shullai ba u MP ka Shillong u Bah Vincent H Palat u la shu pynlut por ha kaba bam soh ot ha kyndong hapoh Parliament ka dei ka bym don nongrim bad kiba thylli bad suda.

Ha kajuh ka por u Bah Ronnie u la kynthoh  ruh ia u Bah Sanbor da kaba ong ba ia lade um ju kren hapoh Assembly.

Haba kren sha ki lad pathai khubor, u Bah Ronnie u la ong, “Katno sien phi la iohi ia u Bah Sanbor ba u la wan shapoh Assembly. Katno sien u la kren hapoh Assembly? Ha kaba iadei bad ki jingtreikam jong u Bah Pala, Nga tharai shibun ki kam kiba u la leh. U long u briew uba jar jar.Um ju kwah ban put turoi kumba long kine ki riew sain hima. U la leh shibun ki kam ba bha na ka bynta jong ngi bad Nga tharai shibun Bah ki projek ki la urlong ha ka jylla lyngba ki jingtrei shitom jong u.”

 Halor ka jingkynnoh ba u Bah Pala u la pulom ban pynlong ia ki DISHA meetings hapoh ka constituency, u Bah Ronnie u la ong ba dei ban sngewthuh ba ha ki 2-3 snem kiba la leit ka don ka jingshah ktah ha ka khlam Covid-19 bad shibun ki skhim ym shym la pyllait da ka sorkar pdeng.

Nalor kata u la ong ruh ba ka jingmang tyngka na ka bynta ka MGNREGS bad kiwei pat ki kam pynroi na ka bynta ki thain nongkyndong ruh la pynduh, kumta ban shu pynlong ia ki jingialang khlem da don ki mat ban iakren kam don jingmut ei ei ruh.