Ki jingpynpaw pyrshah Sorkar ka daw ka jingrem ka UDP ha ka elekshon ADC: Paul

Syllad | The Rising MeghalayaFebruary 26, 2025

U Nongialam ka United Democratic Party (UDP) uba dei ruh u Myntri Sorkar, u Bah Paul Lyngdoh ha ka 25 tarik Rymphang u la ong ba ki jingpyrshah sorkar ka dei kawei na ki daw halor ka jingbym lah lehbha jong ka party ha kane ka elekshon Autonomous District Council (ADC) kaba dang shu dep ha Rilum Khasi bad Jaintia.

Ka UDP ka la jop tang 5 seat ha ka elekshon ha Khasi Hills Autonomous District Council (KHADC) bad 3 seat ha Jaintia Hills Autonomous District Council (JHADC).

“Ka jingbym lah ban lehbha ka dei namar ki jingpyrshah sorkar naba ki briew ki sngew beit ba u synsar thymmai u kham sar khuid kumba phi baroh ki tip ba ka VPP kam pat ju don ha ka bor kumta ka suk palat lada phi shu shong na gallery bad kdew hangno don ki jingbakla ha madan, hynrei lada phi la don slem ha madan kumta ruh ki briew kin sa kdew kti ia ki jingbakla jong phi namar phi hap ban trei bha, hynrei ka VPP haduh mynta kam apt ju ioh bat ia u lakam synshar.Kumta ka long kaba suk ban ong ba ngi dei ki bym don ha ka bor, ai ka bor ia ngi bad ngin sa ai ka jingshakri,” ong u Ba Paul haba kren sha ki lad pathai khubor.

Haba pyrto ia ka Voice of the People Party (VPP) halor ka jinglah ka jong ka ban leh bha, une u nongialam ka UDP u la ong, “Ka long kaba bha mynta ba ki la don ha ka kyrdan kaba biang eh ban ialam ia ka EC hapoh KHADC. Nga kitbok ia ki bad ruh ba kin lah ban pyndep ia ki jingkular elekshon ki jong ki.

La ka VPP ka la shim kabu halor ka jingsngew myllung jong ki paidbah, u Bah Paul u la ong, “Nga lah ban ong ba ka rukom ialap elekshon ka jong ki ka iapher bha bad jong ngi, hynrei sa shisien ha ka kam sain pyrthei ka don beit ka jingkhein ba phin kiew, phin poi sha ka bynta ba halor eh bad hadien phin sa nang hiar suki suki bad poi sha trai bad kiew biang. Nga tharai ba kata kaei kaba la jia kan sa jia biang.”

Haba kylli, une u Myntri u pyntip ba ka UDP shen kan sa iakynduh na ka bynta ban iakren ha kaba iadei bad ki jingmih na kane ka elekshon sha ki ADC.

“Hooid, ha ka kam sain pyrthei barabor ka don ka jingkiew ka jinghiar. Hooid ka jingtreikam ka jong ngi ka la duna bha. Kum ka party ngin sa iakynduh bad bishar bniah hangno ki don ki jingbakla bad ruh ban pyrshang ban pynthikna ban pynioh pat ia ki jaka ba khatduh kiba la duh noh,” u la ong.