Ki kam shong shngain ka thong ba hakhmat eh ka sorkar; ong u CM haba plie iaka Police Outpost ha Mallangkona

Syllad | The Rising MeghalayaJune 21, 2024

U Myntri Rangbah ka Jylla u Conrad K Sangma ha ka 21 tarik Jylliew u la leit ban plie ia ka building ba thymmai jong ka Mallangkona Police Outpost ha West Khasi Hills District, ha ka jingiadon lang u Symbud Myntri Rangbah u Bah Prestone Tynsong, MLA, R Momin, DGP Meghalaya Kong Idashisha Nongrang, MDC Gigur Myrthong lem bad ki heh ophisar ka Tnat pulit.

Haba aijingkren ha ka jingialang, u CM u la ong ba ki kam shongshngain jong ki nongshong shnong ka Jylla ka dei ka thong kaba hakhmat eh jong ka sorkar.

“Kane ka dei ka jingdawa kaba la slem jong ki paidbah ka Mallangkona ban don ia ka Police Outpost.Ka jingwanrah ia kane ka Police Outpost bathymmai kan phah ia ka khubor kaba khlain ba ki kam shongshngain bad ki lad aijingiada ia ki nongshong shnong jong ngi ka dei ka bynta kaba kongsan tam,” ong u Conrad.

Nalor kata u la ong ruh kiba kum kine ki jingtei kiba kongsan yn sa wanrah ruh ha kiwei kiwei pat ki jaka kiba ju mih ki jingiakynad hapoh ka Jylla khnang ban lah ban pynbiang ia ki lad jingiada ia ki nongshong shnong.

Lah ban kdew ba ka Ka Mallangkona ka dei kawei na ki shnong kaba don markhap ka Assam bad  kaba ju mih bha ka jingkynad namar ki kam pynibor jong ki briew na ka Jylla Assam ha ki snem kiba la leit noh.

U CM u la ong ruh ba ka jingdon ia ki outpost ha ki jaka kiba don ha ki thain khappud bad ka Assam kan pynioh ia ka jingsngew shngain hapdeng ki nongshong shnong bad ba kin lah ruh ban khanglad ia kino kino ki jingjia. U la ong ruh ba ka sorkar ka tip bha halor ki jingeh kiba ki nongshong shnong ki thain khappud ki iakynduh bad pynthikna ba ka sorkar kan leh ia kaba bha tam ban weng ia kine ki jingeh.

Kumjuh u Myntri Rangbah u pyntip ruh ba ia kane ka  Mallangkona Police Outpost ba thymmai la tei lyngba ka Police Infrastructure Renovation Fund (PIRF) kaba la ai mynta sha baroh ki Superintendent of Police ba kin don ia ka pisa na ka bynta ban pyndonkam ha ka jingmaramot, tei ia ki jingtei ba thymmai hapoh la ki jong ki District khlem da donkam ban shim ia ki jingmynjur na ka Sorkar Jylla.

Ha kajuh ka por u CM u la pyrto ruh ia ka bynta kaba ki paidbah ka Mallangkona ki la shim da kaba wan shakhmat ban iarap ia ka sorkar da kaba trei kum ki nongbylla bad kumjuh ban pynbiang ia ki tiar ki tar.

Ka Mallangkona Police Outpost ka dei kaba la seng naduh u snem 2019. La tei ia kane ka building ha ka jinglut kaba kot sha ka T.17.5 lak na ka skhim Police Infrastructure Renovation Fund (PIRF) hapoh ka shnong Mallangkona kaba hap hapoh Mawsynrut Civil Sub-Division.