Ki karkhana Coke ki dang kham ma ban ia u COVID-19, yn khang u DC iaki bym ioh CTO ha Elaka Sutnga

Syllad | The Rising MeghalayaAugust 3, 2021

U paidbah nongshong shnong ka Elaka Sutnga haka sngi ba Ar ula mih puk sha surok ban pyrshah iaka sorkar MDA halor ka jingieng rasong ki Coke Factory ne ki karkhana saiñ rnga dewiong ka Elaka Sutnga, East Jaintia Hills District bad dawa ban khang mardor ia ki karkhana beaiñ.

Ki khun ka elaka Sutnga kiba la kot da ki spah ngut hapoh ka jingialam ka Environment Coordination Committee (ECC) Elaka Sutnga ha ryngkat ka jingiadonlang u MLA Sutnga Saipung ma Shitlang Pale nalor ki nongialam ka ECC kila iaid paidbah na ka Shi Kilo ryngkat ki placard kiba thoh iaka jingktah kine ki karkhana saiñ rnga dewiong iaka koit ka khiah bad ka mariang. La pynkut ia kane ka jingiaid paidbah ha phyllaw ka DC ophis, East Jaintia Hills District.

Ki katto katne ki jingthoh ha ki placard ki ong ‘Phi ong ka ja kpoh, Ngi ong ka Bih Kpoh’ ‘Coke will make you choke’ ne U rnga dewiong u pynshitom ban ring pynhiar mynsiem’ ‘Coke factories are more dangerous than COVID-19’ ne ‘Ki karkhana coke ki dang kham ma ban ia u COVID-19’. La pynrem ia u Myntri ka tnad Industries and Commerce Ma Sniawbhlang Dhar, u Myntri Rangbah Conrad K Sangma nalor ka Meghalaya State Pollution Board kaba la ai certificate sha kine ki karkhana khlem kano kano ka pynsngew paidbha wat la tei iaki karkhana hajan ba shong ba sah ki briew.

Lah ban ong ba kane kan dei ka sien kaba nyngkong ba u paid ka Elaka Sutnga un mih paidbah ban pyrshah iaki Coke Factory kiba la jyllei ka ki shnong bapher bapher naduh Sookilo ter ter sha Umpleng, Umthe bad Nongjri bala ieng ki kharkhna beaiñ kum ki tit kiba la ktah iaka koit ka khiah bad ka sawdong sawkun ka mariang.

Ki nongialam ka ECC naduh chairman DH Malang, Pynbait Sutnga Secretary, u Reading War legal adviser, Rieweh Kupar Sutnga, Hambertus Nongtdu bad kiwei kiwei ki nongialam shnong nalor u ma Shitlang Pale kila iakynduh ia U DC East Jaintia Hills ban dawa na u ban khang shisyndon iaki karkhana kiba la shna beaiñ.

Na kaliang u Deputy Commissioner, Bah E Kharmalki, ula ong ba na kaliang jong u phah iaki magistrate bda ki pulit ban khang ia baroh ki karkhana kiba bym shym la ioh satia iaka certificate Consent to Operate (CTO) ban ioh pynmih ia u rnga dewiong.

U DC ula ong ba ka ophis u DC ka dei kaba khatduh ban ioh jingtip halor ka jingioh certifictae ban seng iaki karkhana naduh Consent to Establish (CTE) ne CTO bad ka Single Window Agency (SWA), hynrei kaei kaba ka ECC kala pynsngew un rah iaka sorkar.

“Phi dei ban wad jingtip ruh na ka Elaka bad ki bor shnong kumno ki ai NOC ia kine ki karkhana ban ieng rasong,” la ong u DC iaki nongialam ka ECC ban wad jingtip.

U Ma Shitlang Pale MLA ka thain Sutnga Saipung ula ong “Nga pyrshah jur ia kane ka jingieng rasong kine ki karkhana namar ba ki pynjaboh iaka mariang bad ula dawa na ka sorkar ban pyndam mardor.”

“Ngi kwah iaka koit ka khiah bad ngi donkam iaka lyer kaba khuid bad kim donkam ia kine ki karkhana kiba ktah iaka koit ka khiah bad pynjakhlia iaka mei mariang jong ngi,” la ong u ma Shitlang Pale bad ula ong ba um don jngtip ba ki shnong ruh ki ai NOC bad hadien bala khih u paidbah ba u ioh jingtip ba ki shnong ruh ki donkti ban ai NOC.

U Ma Rieweh Kupar Sutnga haba kren bad ki nongthoh khubor ula ong kumba 39 tylli ki karkhana coke ki dei kiba beaiñ. 7 tylli ki karkhana kila ioh CTO ne ban pynmih rnga dewiong bad 12-13 tylli dei kiba la ioh tang iaka CTE ban shna iaka karkhana.

Baroh kine ki karkhana kidei kiba pyniaid da ki bar jylla bad la shah kyrteng da ki trai muluk, la ong u ma Rieweh.

U Ma Rieweh ula ong bun ki nongmihkhmat bad ki riew paidbah kila buh jingkylli kumno ki karkhana sain rnga dewiong ki ioh dewiong haba naduh u snem 2014 la khang iaka jingtih dewiong haka Jylla.

Ula ong kane ka jubab ka dei ban ai da sorkar MDA naduh u Conrad K Sangma, Myntri Rangbah ka Jylla, u Sniawbhalang Dhar bad u Prestone kin jubab kumno kine ki karkhana ki mih kum ki tit ha East Jaintia Hills.