Ki khynnah ki dei ki lawei jong ka ri, sangeh ban pyntrei bylla iaki khynnah ong u Phadar Manbha

Syllad | The Rising MeghalayaJune 13, 2020

U Phadar Manbha Pakem Director jong ka Jaintia Hills Development Society (JHDS) ula ong “Ki khynnah kidei ka lawei jong ka ri bad ka jait bynriew, kumta ym dei ban pynshlur iaki khynnah ban trei bylla haka rta kaba dang rit, hynrei ban pynioh iaki ka jingnang ka jingstad ba kin lah ban ieng hala ka jong ka kjat bad ban long ki myntoi jong ka imlang ka sahlang.”

“Ki kmie ki kpa bad ki nongshong shnong ki dei ban pynïoh ïaka hok jong u/ka khynnah da kaba sangeh ka jingpyntrei bylla iaki khynnah bad phah iaki sha skul ban ioh jingnang jingstad bad ban saindur iaka jingim jong ki naduh dang rit,” ong u Phadar Manbha Pakem haba kren haka jingrakhe ïaka World Day against Child Labour ne ka sngi pyrshah ïaka jingpyntrei bylla ki khynnah rit ha Good Shepherd Ladrymbai bad ha Vianney hall, Marianhill Jowai.

Ia kane ka prokram la pynlong tang da ki para nongtrei jong ka Childline, kaba pyniaid da ka Jaintia Hills Development Society ka kynhun seng treimon sngewbha ka Jyllaniam Jowai.

Namar ka jingkhang khyrdep ne lockdown ki nongtrei jong ka Childline kila rakhe ia kane ka sngi pyrshah pyntrei bylla iaki khynnah rit tang hapdeng para ba iatrei ban phah iaka khubor sha ka imlang ka sahlang baroh ban iakhun pyrshah iaka jingpyntrei bylla iaki khynnah rit. La pynphuh pynphieng ia kane ka prorkam da ka jingrwai bad ki jingialehkai skit ba shimbynta da ki nongtrei ka Childline ha kine ki ar jaka.

“Kino kino kiba lap bad shem ïa ki khynnah kiba shah pyntrei bylla jubor ha ki jaka kiba ktah iaka koit ka khiah bad ka jingheh jingsan u khynnah kila lah ban pyntip sha ka Childline tang da kaba nion ha u nomber 1098,” ong ka Kong Mandakini Nongtdu Coordinator JHDS bad bynrap ba ka Childline ka trei 24 kynta haka shi sngi bad lyngba ka Childline ki iarap iaki khynnah kiba sakma, kiba shah lehbein bad shah pyntrei bylla da kaba ai jingsyllok bad pynioh iaki khynnah iaka hok jong ki.