Ki kyndon ialap election ki candidate ha East Jaintia Hills

Syllad | The Rising MeghalayaJanuary 25, 2023

Ka Synjuk Waheh Shnong East Jaintia Hills District kala buh da ki kyndon iaki candidate ban iakhun iaka election MLA sha ka iing dorbar thaw aiñ ka Jylla na ka bynta ban pynneh iaka shongsuk shongsain bad ban pynlong iaka election kaba khuid kaba suba.

Ka East Jaintia Hills District ka don ar tylli ki constituency bad kine ki kynthup iaka 5 Sutnga Saipung Constituency bad ka 6 Khliehriat Constituency.

U President bad General Secretary ka Synjuk ba kynthup ia u Ma Hambertus Nongtdu bad u Ma Jespar Bareh kila ong ba ia kane ka rai ka synjuk kala shim haka jingialang kaba long haka 23 tarik une u bnai Kyllalyngkot bad la kyntu ia baroh ki candidate ban iatreilang bad kqa synjuk khnang ban iaid beit iaid ryntih ka kam ialap elekshon.

Kine harum ki kyndon:

• Yn shah tang hapoh 15 tylli ki kali rit kynthup bad ka kali jong u candidate na ka bynta kane ka Meghalaya General Assembly Election 2023 ban rung sha kano kano ka shnong hapoh u pud u sam jong ka East Jaintia Hills District, ha kaba u candidate u leit rung ban pynlong ia ka jingialap election paidbah.

• Lada donkam rally, yn shah tang shisien ia u wei u wei u candidate ban pynlong rally paidbah.

• Ka por ialap election ka dei ban long kat kum ka por ba la buh da ki bor sorkar ba dei peit, bad ruh ba ym dei ban pynjakhlia pynjaboh ia ka sawdong sawkun ha ka por ialap election.

• Yn ym shah ia kiba nabar shnong ban leit sha ka jaka ialap election paidbah jong uno uno u candidate kaba u pynlong ha kano kano ka shnong lait noh na kitei  kitei ki nongbud jong u kiba la wanlang bad u hapoh jong kitei ki 15 tylli ki kali rit bad ki trai shnong jong kato ka shnong ha kaba u candidate u leit pynlong ia ka jingialap election paidbah.

Ka synjuk ka kyrpad iaki Dorbar Shnong baroh hapoh jong ka East Jaintia Hills District ban pyntrei kam ia kitei ki kyndon ba la kdew haneng hapoh jong ki shnong ki thaw jong ki.

La kyrpad ruh ia baroh ki candidate ha baroh artylli ki Assembly Constituency jong ka East Jaintia Hills District ban iatreilang bad ka synjuk bad ki Dorbar Shnong hapoh ka East Jaintia Hills District, da kaba bud beit bud ryntih ia kitei ki kyndon jong ka seng, kiba la kdew haneng.

Nalor kine ki kyndon, ka synjuk kam khang iaki bor shnong ban buh iaki kyndon katkum ka rukom pyniaid shnong kiba wanrah iaka miat ka bha ka shnong.