Ki kynhun ba don bynta ha ki kam jngohkai ki dei ban don ki SOP ia ki nongwan shangkai: Paul

Syllad | The Rising MeghalayaDecember 31, 2024

U Myntri sorkar uba khmih ia ka Tnad kam jngohkai u Bah Paul Lyngdoh ha ka 30 tarik Nohprah u la ban jur halor ka jingdonkam ia ki kynhun bapher bapher kaba kynthup ia ki Dorbar Shnong kiba don bynta ha ki kam jngohkai pyrthei ba kin pyntreikam ia la ki jong ki Standard Operating Procedure (SOP) ban teh kyndon ia ki nongwan shangkai kiba leit jngoh sha ki jaka jngohkai bapher bapher hapoh ka Jylla.

Kane ka jingpynpaw jong u Myntri ka la wan long ruh hadien ka jingjia ba dang shen hapoh kawei ka iingmane ha Mawlynnong, East Khasi Hills ha kaba uwei u nongwan shangkai u la pyrta ‘Jai Shree Ram’ hapoh ka iingmane nalor ka jingbyrngem ba dang shen jong ka seng Hindu ka Kutumba Surakshya Parishad (KSP) namar ka jingshah khanglad ban lehniam hapoh ka krem Mawjymbuin ha Mawsynram.

Haba kren sha ki lad pathai khubor, u Bah Paul u la ong, “Ka long kaba sngewsih halor ka jingdon jong kiba kum kine ki briew kiba pyrshang ban pynthud ia ka suk ka sain ha ka jylla jong ngi. Kum u Myntri ka Tnad kam jngohkai nga pynrem jur ia kiba kum kine ki jingpyrshang, kata lyngba ka jingjia kaba la jia hapoh ka iingmane ha Mawlynnong bad kito ki kynhun ha kaba iadei bad ka krem Mawjymbuin kiba pynkylla sha ka kam niam.”

“Hynrei, kine ki jingjia ki dei shibynta jong ki riew shit niam Hindu ia kiba ngi pyrshah jur,” u la bynrap.

U Bah Paul u la ban jur ruh ia ka jingdonkam ba ki kynhun Balang ba kin don katto katne ki jingpyrkhing ha ki jaka mane ba ia kiba kum kino ki briew kiba dei ban shah ban rung shapoh sha iingmane.

U la ong ba ha kiwei pat ki ri ki don ia ki kyndon ban shah ia ki briew ba kin wan jngoh bad ban wan rung shapoh ki iingmane.

“Ka jingjia kaba la jia hapoh ka iingmane ha Mawlynnong ka dei ban pynpeitmat ia ki kynhun balang namar kane ka hap hapoh ka jingkhmih jong ki balang bad kam don jingiadei ei ei bad ka sorkar,” u la ong da kaba kular, “Ngi kum ka sorkar ngi ieng skhem ba ngin ym ailad ia ki riew shim kabu ba kin shim kabu ia ka jinglong jingman da ka jingthmu ban pynthohbria ia ka jylla lyngba kiba kum kine ki jingleh jingkam ki bym don jingkitkhlieh.”

Nalor kata u la ong ba na ka liang ka Director General of Police (DGP) ka la dep ban pyntip ba ka Tnad pulit ka la dep ban ithuh ia une u briew uba donkti bad ka ain kan sa shim ia la ka jong ka sienjam.