Ki kyrtong ki dei ban burom ia ka rai ki Dorbar Shnong: Cyril Diengdoh

Syllad | The Rising MeghalayaFebruary 5, 2025

U Commissioner & Secretary ka Tnad District Council Affairs, u Bah Cyril Diengdoh haka 4 tarik Rymphang u la ong ba ki seng sain pyrthei bad ki kyrtong ba iakhun ia ka elekshon Autonomous District Council (ADC) ki dei ban burom ia ka rai jong ki Dorbar Shnong ban pynlong ia ki ‘Common Platform’ kum ki rynsan ialap elekshon.

Haba kren sha ki lad pathai khubor, u Bah Cyril u la ong ba ka jingpynlong ia ki jingialang ka dei kaba hap ban iaid katkum ki kyndon jong ka Model Code of Conduct (MCC) na ka bynta ki seng sain pyrthei bad ki kyrtong na ka bynta kane ka elekshon sha ki ADC, bad ia kane la phah ruh sha baroh ki party sain pyrthei ba ki donkam ban ioh ia ka jingbit na ki Deputy Commissioner lane na ki Sub Divisional Officer na ka bynta ban pynlong ia kino kino ki jingialang paidbah, ki rally ne jingiaid paidbah.

Watla katta u la ong ba ki don katto katne ki Dorbar Shnong kiba la rai na ka bynta ban pynlong da ki Common Platform.

Ki Rai ka Dorbar Shnong Mynthong, Jowai kiba iadei bad ka Election MDC

“Kine ki shnong ki la ioh jingbit ban pynlong ia ka Common Platform namar ha kane ka Common Platform, ki la ai ia kajuh ka lad sha baroh ki seng sain pyrthei kynthup ia ki kyrtong shimet ba kin wan lang ha kajuh ka rynsan bad pyniaid ia ka jingialang paidbah. Ym don satia kiba shah pynduh. Ym don ki seng sain pyrthei lane ki kyrtong ki ban shah kyntiat ban pynlong ia ka jingialang ha ka Common Platform. Ia kane ngi la dep pynshai ba hooid lada don ki rai jong kino kino ki shnong, ngi burom ia kata ka rai bad ki lah ban pyniaid shakhmat,” ong u Bah Cyril.

“Ka jingujor ba la ioh pdiang dang shen ka long ba ki don katto katne ki shnong lehse katto katne ki seng sain pyrthei ki bym shym la ioh jingbit, kumta ngi la pynmih ia ka jingbthah sha ki DC ban iakren ia ki Rangbah Shnong khnang ban lah ban pynlong ia ka elekshon ka bym don jingshah liang, baroh ki seng sain pyrthei kynthup ia ki kyrtong ki dei ban ioh ia ka lad ban pynlong ia ki jingleit ialap ia ki elekshon, hynrei kata hadien ba la ioh ia ka jingbit,” u la ong.

Ka jingpynbeit ka shnong Panaliar na ka bynta ka jingialap elekshon ki kyrtong MDC sha ka JHADC

“Lada ki la rai ban pynlong beit tang da ki Common Platform bad ki la rai ba kan dei ka rynsan kaba ki kwah ban pynlong ia ka jingialang kumta ruh ka long kaba dei. Lada ki rai ba kim kwah ban don ia kino kino ki jingialang lait na ki Common Platform ba la ai jingbit halor ka nongrim ka long ba ki kwah ban ai kajuh ka kabu ia baroh ki seng sain pyrthei bad ki kyrtong ba kin iashim bynta ha ka Common Platform, kumta ruh dei ia ka ban burom khnang ba baroh kin ioh ia ka lad ban aijingkren sha ki paidbah,” u la bynrap.