Ther u ma Moonlight Pariat iaka sorkar MDA ba lait rud ka pisa na ka pla tyngka ka sorkar & ka jingpyntlot bor iaka JHADC

Syllad | The Rising MeghalayaDecember 18, 2022

U Moonlight Pariat u kyrtong ka United Democratic Party (UDP) na 2-Jowai Constituency ula ther tyngeh iaka sorkar MDA kaba ialam da ka National People’s Party (NPP) halor ka jinglait rud ka pisa na ka pla tyngka ka sorkar bad ka jingpynduh bor iaka Jaintia Hills Autonomous District Council (JHADC) haka sngi Saitjain.

U Ma Moonlight ula ong ba ka pisa da ki klur ka liat sha ka pla jongno re jongno na ka kam khaii dewiong, katba ka khajna kaba dei ka sorkar ban ioh ka lait ruid ha kane ka sorkar kaba ialam da ka NPP, kaba iaka pla tyngka ka sorkar la bat da u Conrad.

Haba kren shuh shuh haka jingsdang ialap elekshon u ma Moonlight kaba long ha iing hall ka Dulong, Jowai, ula ong ruh ba kane ka sorkar kaba ialam da u Conrad kala pyrshang har rukom ki jingpyrshang ban pynduh bor iaka Jaintia Hills Autonomous District Council (JHADC)  kaba peit iaka khyndew ka shyiap bad ka riti ka dustur. “Lada wan da kane ka sorkar ha u 2023 kan pyntlot iaka bor jong ki MDC lane kan phah peit ha DC bad ban pyniaid da ka Secretariat iaka konsil kaban ktah iaka riti dustur bad ka rukom bat khyndew ka Rilum Jaintia,” la ong u ma Pariat.

U Ma Moonlight Pariat haba pan iaka jingkyrshan u paidbah ula ong ba ka jingangnud jong u ka long ban shakri iaka Jowai Constituency bad ban pynneh iaka burom ka jong ka ym ban rah, kynriah ne pynjah ia kaei kaba don kumba jia long mynta.

Ula ong ka mat shah ktah bha u nongshong shnong ka Jowai bad ki nongshong shnong ka Jylla ka dei ka lad iohkam iohjam bad ka lad kamai jakpoh kaba la ktah lut ia baroh u kup shilliang sem shiliang. Kumta ula kyrpad rit iaki nongthep vote ban ailad ia u shisien ban shakri iaka Jowai Constituency khnang ba un lah ban pynurlong iaki jingangnud ka jong u bad lada um long uba bit, kyntait ia u.

U Ma Moonlight haba bteng ban kren ula ong haba jied ia u nongmihkhmat wat jied da u ba long kynrad, hynrei jied ia uba lah ban shakri. “Phi la iohi iaka jingsynshar ka NPP ka buh iaka jylla bad ia nga ia phi haka jingma namar ka jingkit ram bad ka jinglaitrud ka khajna bad ka rung sha ka pla ki katto katne ngut,” la ong u ma Moonlight.

Ha kaba iadei bad ka All India Trinamool Congress (AITC) ne ka TMC lada wan biang u Dr Mukul Sangma ban wan biang kum u Chief Minister ka Jylla kan buh iaka jylla haka jingma na ka jingwan buhai shnong u nong Bangladesh.

Ka Chairperson ka AITC ka Mamata Banerjee kala kren shai haki lad pathai khubor ba ki poiwir kiba shong buhai shnong yn pynkylla nong India ia ki. Kane ka ruh ka buh jingma iaka Jylla bad ka North East, ngi ha North East ngi dei kiba rit paid bad lada ioh rung kine ki poiwir sha North East ne ki jylla ha ki thain Shatei Lammihngi khamatam ka Jylla Meghalaya kan shah tyllep ha kine ki poiwir na Bangladesh kiba heh paid, la ong u ma Pariat.

“Ka shnong Jowai kaba long ka district headquarter jong ka West Jaintia Hills, pynban ki ophis sorkar la rah iaki sha kiwei ki jaka. Baroh ngi tip iaka jingpynkynriah tang iaka PWD North Division, hynrei kiba la dep rah ne kynriah ka dei naduh ka Horticulture, KVK Jaintia Hills, Plan ka Diary jong ka tnad Veterinary, ICDS,” la ong shuh shuh u ma Moonlight.

U Ma Pariat ula ong ba ula ioh jingtip ba thikna ba wat ka PHE Electrical Division la kreh rah sha Shangpung, ka Central Division yn rah sha Nartiang bad ka DC ophis ruh yn rah sa sha Wahiajer. Ula ong shuh shuh ba lada rah iaka electrical division sha Shangpung u paid nongshong shnong na kylleng u leit ban siew bai um sha Shangpung ka ban buh jingeh hadien habud.

Ha kaba iadei bad ka ñiut Jowai ula ong ba lada ki nongmihkhmat na rilum Jaintia ki don iaka jingangud ban wanrah iaka jaka theh niut kaba paka, kan shimpor tang hapoh 6 bnai ban pynioh iaka jaka theh niut kata da kaba pynbha iaka jaka kaba la don lypa, pynban namar ba u MLA ka Jowai bad u Sniawbhalang Dhar uba dei u myntri poynroi sor kim don iaka mon ban leh, kane ka kam kala sahkut bad pynlong iaka Jowai ka jaka lumthup iaki ñiut bad ki iing ki sem ruh kila sma iwtung.

U Ma Pariat ula thalain tyngeh iak sorkar MDA kaba ym phaikhmat ban pynjem iaka jingeh ki samla kiba la dep pule ha ki kyrdan kyrdan bapher bapher ban pynioh kam iaki haba ki post kiba thylli ki don haduh 8000 post ha ki tnad sorkar bapher bapher. Ula ong ruh ba kyrduh kam ki samla ka jia ha baroh kawei ka jylla.

Ha kane ka sngi sdang ka ialang ialap elekshon u ma Pariat haduh 600 ngut ki paid nongshong shnong ka Khliehtyrshi kila pynrung kyrteng ialade sha ka UDP bad kila rai tylli ban kyrshan ha u ma Pariat.

Kum ka dak ban sdang noh ka jingialap elekshon u ma Moonlight Pariat u kyrtong ka UDP na 2 Jowai Constituency ula pynher ruh iaka lama haka iing jong u ha Dulong.

Iaka jingialang la pyniaid da u Kitboklang Nongtdu general secretary ka UDP West Jaintia Hills  haka jingiadonlang ki nongialam u ma Moonlight Pariat kiba kynthup ia u Sanbok Rymbai, Chem Biam, Lephing Pyrtuh, Marki Mulieh, GM Lamar, Deisa Muruh, Kong Robila Mylliem Pdah, Peter Kharmuti, Tiarsing Nongrum bad kiwei kiwei.