Ki MDC 2019-2024: Ka Lyngkor jong ki

Syllad | The Rising MeghalayaMarch 8, 2019

Ka kam ki paidbah kala kut bad mynta ka lah poi sa ka pali ki rangbah ia kiba ngi la pynkup ia ka bor bad iktiar kum ki MDC, ha KHADC bad JHADC jongngi, ban ai ia u synniang shakri sha ka Jaitbynriew Hynniewtrep lyngba ki ADC.

Hangne harum, nga kwah ban kdew ia ki katto katne ki mat ia kiba ki ar tylli ki Distrik Konsil ki dei ban shimkhia ban pyntreikam ha kine ki san snem kiban wan:- 

Ka Jinglong Laitluid ki Distrik Konsil: Ban iakhun pynurlong ia ka Bor treikam laitluid (Autonomy) jong ki Distrik Konsil khlem kano kano ka jingtuklar na ki tnat sorkar kum ka District Council Affairs (DCA) ka Sorkar Jylla bad ka Ministry of Home Affairs(MHA) ka Sorkar Pdeng kan long ka thong kaba hakhmat duh jong ki MDC thymmai jongngi. Ngi la iohi ia ka jingsahkut jong kiba bun bah ki Bill ba la pass da ki ADC, ki bym shym la ioh iaka Assent jong u Governor ka jylla. La khein iaki ADC tang kum i shnat rit (Sub- Department) jong ka DCA. La khein khiew jakai ia ka rai ki nongmihkhmat ba la jied da u paidbah trai ri ban shna ain kanun na ka bynta ka biang ka shngain bad ka skhem jongki hala muluk hala Ri. Ha kane ka rukom ba mynta, u Ophisar ne wat u LDA ka DCA u kham khraw ban iaki 120 ngut ki MDC ka KHADC, JHADC bad GHADC, ban ia ka Sixth Schedule bad ban ia ki paidbah kiba la jied iakiha ki elekshon iajied MDC. Ym tang katta, hynrei ha ki bnai bad snem bala leit noh, ngi sakhi ba wat ka MHA jong ka Sorkar Kmie ruh ka la wan tuklaria ki Bill Jong ki ADC bad ia kane la pynshisha lyngba ka ishu VAB. Ka por bad ka kam ka dawa, namarkata iaki MDC ban iakhun dohiap halor kane ka phang khnang ba kan ym iai long ka jingibein ia ka mon jongngi u paidbah ne ia ka iktiar ki ADC kum ki shlem thaw ain ia kiba la pynkupbor da ka Riti Synshar ka Ri India lyngba ka Sixth Schedule. 

Ka Jingpynkylla ia ka Sixth Schedule: Ka por ka dawa iaki MDC baroh ban iathir sani halor kumno ban wanrah ia ka jingpynkylla ha ka Sixth Schedule ka Riti Synshar ka Ri India, namar la i donkam kyrkieh ban pynbha bad pynkhlain shuhshuh ia ka Sixth Schedule Amendment Bill kaba lah poi ha Rajya Sabha  ka Parliament ka Ri India. Kane ka Bill ka don shibun bah ki jingdkoh ki ban wanrah jingma iangi ki trai ri riewlum ritpaid ka Ri. Kawei na kita ka long halor ka jingioh MDC ka GHADChaduh 42 ngut katba ka KHADC pat ka ioh tang 40 ngut; ka jingpynbeit ka long kaba noh shiliang tarajur, namar ha ki pud ka KHADC ki don haduh 29 ngut ki MLA katba ha ki pud ka GHADC, ki don tang 24 ngut kumba ka long mynta.

Sa kawei pat ka jingduna ka long halor ka kyndon ban buh MDC shu sieh da kiwei pat ki riewlum ki bym dei ki Khasi, Jaintia bad Garo. Lada longkam kane, ngam tip ngin dang lah ne em ban pakhang ia ki bym dei ki riewlum ban thep vote ha ki elekshon ADC. Kumno ruh ka lah ban long ba ka Sorkar jylla kan rai ban pynduh syndon ia ki Dorbar Shnong bad ban bujli pynban ha ka jaka jongki da ki Village Council bad Municipal Council. Kane hawto kam dei ka jingtuklar ia u pudtreikam ki Distrik Konsil? Hynrei, don ruh ki bynta ka Amendment Bill ia kiba ngi dei ban kyrshan, bad kita ki long, halor ka Ain Kyntiap Seng ( Anti- Defection) ia ki MDC bad ruh de, halorka Direct Funding.

Ia ka Para 3 jong ka Amendment Bill ruh donkam ban pynbeit namar ba ki ADC ki donkam ban ioh bor shuh shuh khamtam ha kaba iadei bad ka khyndew ka shyiap, ki khlaw ki btap, ka jingiada na ka jingrung laitlan ki mynder ri bad kiwei de. Dei ban pynkylla ruh ia ka Para12 A (a) bad (b) khnang ban aibor pura ia ki Distrik Konsil bad kumjuh ka Para 20 khnang ban ioh pynbeit noh ia u pud u sam.

Ki Dorbar Trai Ri bad ka iktiar jongki: La i donkam kyrkieh ban ithuh bad ban pynkupbor ia ki Dorbar Trai Ri kum ki Dorbar Shnong, Dorbar Kur, Dorbar Raid, Dorbar Hima bad kumta terter. Ia ki ain jong ki Hima dei ban kham pynkhlain shuhshuh; bad naka bynta ki Hima ki bym pat don jingthoh ain, dei ban shna noh mardor.Ki MDC ka KHADC ki dei ban buddien halor ka Clan Administration Bill bad ban pynthikna ban pynioh shen ia ka jingmynjur u Lat ka jylla, iaka. Ka JHADC ruh kadei ban sdang thaw ain noh halor kane ka bynta.

Ka Kam Khaii Pateng: Dei ban pynkhlain shuh shuh ia ka Trading by Non-tribal Act bad kumjuh ki rules jongka . Ka khaii pateng kaba long u budlum bad u syngkai ka ioh ka kot ka dei ban wanphai biang sha ka kti ki trai ri trai muluk bad ia ka kam khaii Benami dei ban pynduhjait syndon.

Halor ki Ain Iada Riti:Ia ki ain iada Riti bad iada dustur kum ka Lineage Bill la donkam ban pynioh iaka jingmynjur jong u Lat ka jylla. Kum shibynta ban ai mynsiem ia ki rangsamla jongngi ba kin sngewskhem ha ka kolshor jongngi, lah ban wanrah ruh ia ki ain kum ka Inheritance Bill , ha kaba ki shynrang ruh kin ioh bynta lang na ka spah , ki jingdon jingem bad ka kam ka khaii jong ki kmie ki kpa kum ba long ki khun kynthei.

Halor ka Synshar Sor: Ia ka rukom synshar sor (town administration )dei ban pynbeit noh hapdeng ki ADCbad ka Sorkar Jylla khnang ban weng noh ia ka jingkyntur pud kaMUDA, bad kumjuh ban lait na ka jingiatyngkhuh ki ain shna iing ka MUDA bad jong ki ADC.

Ka Independent Ilaka Tribunal: Ka Synshar khadar trai ri, ha baroh ki kyrdan ka dei ban lait na ka kam iakhleh jaktung politiks. Lyngba ka jingsdang ia ka Independent Ilaka Tribunal, ka ban shimbishar halor kino kino ki kam buaid politics da ki bor synshar trai ri kum ki Dorbar Shnong, Dorbar Raid bad kiwei de ki khlieh nongsynshar.

Halor ki kam pynroi: La donkam kyrkieh ban wanrah ia ka District Council Development Advisory Board ka ban ai jingmut halor kumno ban wanrah ia ki kam pynroi ha ki jaka u pud u sam ki Distrik Konsil.

Ka Kam Khajna: Ka jingiatyngkhuh bad ka Sorkar Jylla halor ka Royalty na ki mar pohkhyndew ne ki dieng ki siej ka la ju wanrah jingeh bun bun sien ia ki ADC. Donkam ban pynbeit pynjanai ia ka rukom lum khajna lum musur ki ADC khnang ban pynthikna ba ka thiartyngka ki ADC kan dap naka bynta ki kam kiba bun kiba ki dei ban leh bad pyndep.

Ka Khuid ka Suba ha ka kam pisa tyngka: La i donkam kyrkieh ban wanrah ia ka rukom treikam kaba khuid ba suba ha KHADC bad JHADC jongngi.Ka kolshor thungkam sopsop ka dei ban duh noh; ka kam lum khajna lum musur ka dei ban long kaba khuid, ba ryntih bad ka bym don kano kano ka kam bamtuh ne bamsap.

Halor ka Ktien, ka Kolshor bad ka Rwai ka Shad bad kiwei de ki Sap Bad jingstad tynrai trai ri: Kum ki nongda nongri ia ka lariti ba kyrpang bad riewspah jongngi, kan dei ka kamram jong ki Distrik Konsil ban lumthup ha ki jingthoh ne ki phlim ne ki dur ia ki drama, ki khana puriskam, ki jingshad jingrwai tynrai na kylleng ka bri u Hynniewtrep. Kumjuh de, halor ka sap trai ri ha ka liang ka sumar pang lyngba ka khem ka spud bad kumjuh ki kynbat dawai; ia kane ruh dei ban buhbeit lyngba ki kot ne ki dur ne ki phlim khnang ba ka pyrthei salonsar kan iohi ia ka jingmaian jong ka jingshemphang bad jingstad ia kaba la ai pateng hangi da ki kni ki kpa myndai. Kine ka sienjam, ki long shibynta na ka jingpyrshang ban buhbeit, ban pynneh pynsah bad ban pynpaw de sha ka pyrthei ia ka jingriewspah bad jingkyrpang ka ktien, ka kolshor bad ka rukom im jongngi.

Namar kata, ka jingkhot ka long shaphi ki MDC ia kiba ngi la pynkhamti ia ka bor ka iktiar ban ialam iangi; ba phin long u Sangot jong ka jingangnud jongngi, u Khulom jong ka jingthrang jong ka Jaitbynriew Hynniewtrep Hynniewskum ban pynneh pynsah, ban kyntiew bad ban kyrsiew iala ka jait ka khong bad ban iada iaka na ki ‘phliah ding ba pynbijai’ ka pyrthei shai. Ngi la pynsleh iaphi , wat pynlehrain iangi, bad kumjuh ialade bad iaki kular ba phi la khlei hakhmat u briew u Blei ban shakri khlem manthait iala ka Jaitbynriew lyngba ka rynsan ki ADC.

Da u Bah Robertjune Kharjahrin