Ki MDC ka JHADC ki dei ban mih surok ban talasi ia ki trok kit dewiong beain: Brighstar

Syllad | The Rising MeghalayaNovember 8, 2024

U MDC jong ka Jowai North Konstituensi u Ma Brighstar Chyrmang u la kyntu ia ki MDC baroh ban mih surok ban talasi ia ki baroh ki trok kiba iaid ha surok bah khnang ban tehlakam ia ka jingshalan tuh ia u dewiong na Ri Lum Jaintia kaba la ktah shi katdei eh ia ka pla tyngka jong ka Sorkar Jylla bad ka Jaintia Hills Autonomous District Council (JHADC).

U Ma Brightstar u la pynsngew ia kitei ki kyntien haba ai ia ka jingkyrshan jong u ia ka motion bala wanrah da u MDC jong ka Jowai Central u Ma Andrew Shullai ha ka Dorbar Tlang jong ka JHADC kaba long haka 7 tarik Naiwieng.

U MDC jong ka Jowai North u la ong ba u dewiong u dei marpoh khyndew uba ha khmat eh u ba ai shibun bah ka khajna sha ka Sorkar Jylla bad ka JHADC hynrei ka long kaei kaei kaba sngewkhia ban iohi ia ka jingtih dewiong beain bad ka jingshalan dewiong beain na ka Ri Lum Jaintia.

Haba wanrah ia ka motion, u Ma Shullai u la kynthoh jur ia ka Executive Committee jong ka JHADC kaba ym shim la shim kino kino ki lad ki lynti kiba thymmai ban pynmih pisa ne khajna ia ka Council bad kumba long mynta ka Executive Committee ka shuh ap khmih lynti ban ioh pisa na ka Sorkar Jylla.

U la ong ba JHADC ka dei tnat shimet kaba don bor ban thaw ki lad ki lynti ban pynmih pisa ialade hynrei kumba long mynta ka Executive Committee kam shym la shim kino kino ki lad ki lynti kiba thymmai kumno ban pynmih pisa bad ka JHADC mynta ka kylla long kum ka tnat kaba rit jong ka Sorkar Jylla.

Haba kyrshan ia ka motion bala wanrah da u Ma Shullai, u MDC jong ka Shangpung u Ma J. Treilang Suchiang u la kynthoh ba ki karkhana shna cement kim ai satia kano kano ka jingiohnong ia ka JHADC kumba dei ban long.