Ki MLA kiba mih na Congress ki dei kiba bha bad kiba wan bujli ki khambha shuh shuh ong Vincent Pala

Syllad | The Rising MeghalayaMay 25, 2022

U MP ka Shillong u Ma Vincent H Pala ula pynbna paidbah ban ai reng haka Election MLA 2023 na ka 5-Sutnga Saipung Constituency pyrshah ia u MLA jong ka AITC u bah Shitlang Pale .

Ïa kane u Ma Vincent H Pala ula pynbna haka jingïalang pynrung dkhot ne Induction Programme ïa u Ma Emlang Laloo ba la pynlong da ka Nartiang Block Congress Committee ha Missio Community Hall Namdong haka sngi Balang.

“Nga ruh ngan aireng haka Election ban wan bad nga kyrpad ïa kiba don ha kane ka jingïalang ban pynbna pyrthei ïa kane”, la ong u Ma Pala.

Ula bynrap da kaba ong, “Ngam len ba ka kam MP kadei ka kam kaba sngewtynnad bha, hynrei haba nga peit mynta ki briew ki la ibeiñ ïaka party Congress bad ïaki briew jong ka. Kumta nga la rai la kumno kumno ngan sdang shwa na lade ban pyni ïaka nuksa ba nga ruh ngan ïaleh ïaka election”.

Ula ïathuh ba na kata ka daw ula hap ban mareh nangne sha Shillong na Shillong sha Constituency lajong bad ula pynbna ruh ba mynta un sah shibnai hapoh Constituency jong u.

Haba ïadei bad ka jingmih ki MLA na ka party Congress, ula pynpaw ba nyngkong u sngew ba kadei ka kam kaba eh bha hynrei ha u marwei u sngew ba umdei ban resaiñ ne kynran dien noh hynrei ban ïakhun haduh ban da jop.

“Ka jingmih ki MLA na ka party Congress, nyngkong nga sngew kumba kane ka kam kadei kaba eh bha tangba nga hi ngam ym resain bad kynran dien ngan ïakhun katba lah haduh ban da jop”,.

Shuh shuh ula ong, mynta lada kheiñ ha man ki constituency ka Congress ka la ïoh ïaki kyrtong kiba dang thymmai suba. Phet ka Kong Ampareen Lyngdoh la wan da u kyrtong uba stad bha bad mynta ka Ampareen Lyngdoh kam nud kren shuh. Nangta mih u Mayralborn Syiem la wan da kawei ka muktiar ne lawyer kaba dei ka longkmie kaba stad bha. Mih sa u Kimfa bad ka Congress ka la ïoh da u Scientist uba la pass IIM.

Ki MLA kiba mih na ka Congress kidei kiba bha hynrei kiba wan mih bujli haka jaka jong ki kidei kiba khambha shuh shuh.