Ki MLA kiba phet na ka Congress ki dei kiba kwah jliah iaka pisa dewiong mawshun bad kiwei ki jaka khrong pisa

Syllad | The Rising MeghalayaFebruary 1, 2023

U Ma Vincent H Pala president MPCC ula kynnoh ba ki MLA kiba phet na ka Congress bad pyniasoh sha kiwei ki party ki dei kiba kwah jliah iaka pisa kaba khrong na u dewïong ba shalan beaiñ bad kiwei kiwei ki jaka khrong pisa.

U ma Vincent H Pala uba long ruh u MP Jylla na Shillong bad u ban aireng na 5 Sutnga Saipung kum u kandiate ka Congress mynta ka kynti haka elekshon MLA 2023 kaban long haka 27 tarik u bnai Rymphang ha ka jingialang jong u ha Lumshnong haka sngi Nyngkong ula ther tyngeh iaka synshar khadar jong ka sorkar MDA ba ïalam da ka NPP haduh bala mih kitei ki briew kiba la tip kum High Level ban pyniaid iew ia u dewïong beain.

Ula ong kynnoh ruh ba kine ki high level mynta kila tuklar wat ha ka kam khaii mawshun, u kwai u tympew, u supari kumjuh u rnga bad u shyiap tang na ka bynta ka jingmyntoi ki katto katne.

Haka thain Lumshnong ula ong ym donkam shuh ban batai, katno ngut kiba ïoh challan, katno ngut ki bym ïoh challan bad bun ki nongkhaïi mawshun kiba thied ïaki tiar ki tar kiba heh bad rem dor ban pynpait ïaki maw bah ki la hap ban sangeh noh ban trei namar ka jingdon kita ki high level.

Shuh shuh une u nongialam ba rangbah ka Congress ula ong ba ha kine 10-12 snem kynthup hynniew snem ka synshar ka Congress party, ka Ri Lum Khasi Jaintia ka long kaba sahdien bha ha ki kam pynroi bad namar baroh ki kam pynroi la poi lut sha Rilum Garo.

Ula kdew ba ïaka Medical College kaba dei ban buh ha Shillong ruh la rah noh sha Garo Hills bad shen yn plie paidbah noh. 

Hynrei ula ong ba lada u wan haka bor haka sain hima sima ha Jylla un wanrah ia ki kam pynroi ha rilum Khasi Jaintia bad ula kyrpad iaki nongkyrshan ka Congress bad ula khot ruh iaki nongkyrshan jong kiwei ki party ban ai ka jingkyrshan iaka party ban ai ka jingkyrshan iaka Congress namar ba tang ka Congress kaba peit iaka bha ka miat u kup shilliang sem shilliang.

Ula ong ba ki nongialam bad ki nongkyrshan ka Congress ki dei kiba skhem ka jingmut ka jingpyrkhat bad kim duh jingkyrmen ba party kan wan phai biang haka bor synshar ha Jylla.

Ula kynthoh ruh “Ka BJP haduh mynta kam pat pynmih ïaki thup kyrteng jong ki Candidate bad ka dang ap kino kiba tam na ka Congress, NPP bad kiba tam na kiwei kiwei ki party ba kan pynïeng ïaki. Katba ia ki party rilum pat ula ong ba ki dei ki party rit party ria bad tang ban pynïeng candidate ruh kim pat lah bha sha ka jingjop lei lei ynnai ïakren.

Ula pynksan ïaka seng Congress bad ula ong ha Garo Hills ka jingïaknieh tiket ka long kaba jur. Kumba long mynta ka Congress ha Garo Hills ka don 14-15 tylli ki seat na ki 24 tylli ki seat kiba ka jingïaleh ka long kaba shongshit bad don jingkyrmen ban jop.

Ula ong lada ka Congress ka wan haka bor yn plie ïaka Land Custom Station ha Kuliang lane Umkiang khnang ba ki briew kane ka thaiñ kin im haka kamai kajih bad lait na ka jingkhaïi tuh ïaki mar ki mata.