Ki nongialam ba stad kim ju leitphai sha ka party rim; ki tei da ka iing thymmai: Rakkam

Syllad | The Rising MeghalayaDecember 3, 2024

U nongialam ka NPP uba dei ruh u Myntri sorkar u Rakkam A Sangma ha ka 2 tarik Nohprah u la ong ba ki nongialam sain pyrthei kiba stad bad shemphang kim ju leitphai sha ki party barim jong ki hynrei ki tei la ka jong ka iing kaba thymmai.

Haba kren sha ki lad pathai khubor, u Rakkam u la ong ba u nongialam uba rai ban ieng ha lade un rai ia ka lawei ka jong u.

“U Captain Williamson Sangma um shym la leitphai shuh sha ka APHLC, u Purno A Sangma um shym la leitphai sha ka Congress. Ki nongialam ki tei la ki jong ki iing thymmai,” u la ong.

Haba kylli halor u Myntri Rangbah barim u Mukul Sangma uba la mih noh na ka Congress bad pyniasoh sha ka All India Trinamool Congress (AITC), u Rakkam u la ong, “U la don la ka jong ka iing. U Mukul u dei u nongialam ka TMC. U la ialehkai bha ha Gambegre. Ki la don ha ka kyrdan kaba ar bad iehnoh ia ka Congress sha kaba lai, kumta ka jingdon ka jong u ka long kaba kongsan, hynrei ka shong ba u ba un rai.Ngam long ei ei ruh ban kren shaphang u Muskul. U dei u nongialam ba la rangbah jong nga, hynrei ngam tip balei ba u la mih noh na ka Congress.”

Une u nongialam ka NPP u sngew ruh ba ka daw kaba pynlong ia u Mukul ba un mih noh ka dei ka kam kaba pynkhiah shwa lada ka Congress ka dang kwah ia ka jingwanphai ka jong u.

“Hynrei, ngam tip la ka la khiah ne em.Haba ngi phaidien sha ka histori ka Jylla u Mukul Sangma u dei uba la ioh ia ka jinghikai bad ba la pynkhreh bha da u PA Sangma, ki la ia don ryngkat lang, hynrei ha ka jingiaid lynti ka la don kaei kaei kaba la jia,” u la bynrap.

Nalor kata u Rakkam u pynkynmaw ruh ba ka jingjop jong ka NPP ha ka elekshon shiteng samoi ha Gambegre ka dei ka jingpynpaw ba ka elekshon MP ka dei ka khana kaba iapher bad ong ba ka Gambegre ka dei ka ktem ba khlainbor jong u MP ka Tura u Saleng A Sangma, hynrei mynta u la hap ban mih noh hadien ba ka party jong u kam shym la ioh ban bat shuh ia ka seat.”

“Kane ka kren halor kumno ka NPP hapoh ka jingialam ba stad bad ba khlain jong u Conrad K Sangma, ngi kyrmen ba ka Jylla Meghalaya kan kiew shaphrang,” u la bynrap.