Ki nongialam & dkhot ka KSU kim dei ban long ki mawjynthud ka roi ka par ong u Lambokstarwell

Syllad | The Rising MeghalayaJuly 13, 2020

“Ki nongialam bad ki dkhot jong ka Khasi Students’ Union (KSU) kim dei ban long ki mawjynthud haka imlang ka sahlang, hynrei ba kin long ki briew kiba pynrit ialade bad ban long ki mawpun ban wanrah iaka roi ka par haka imlang ka sahlang jong ka jaidbynriew,” la ong u Lambokstarwell Marngar president ka KSU Central Body.

“Kum ki nongialam bad ki dkhot jong ka KSU ha baroh ki tnad treikam ha Khasi Jaintia bad kiba shabar ka Jylla phi dei ban long ki briew kiba sngewrit ban tynrong halade iaka jingkitkhlieh ban iada iaka jaidbynriew bad ka roi ka par bad ban long ki myntoi ka imlang da kaba sam iaka buit ki bor khnang ban lah ban pyntyllun iaka shalyntem ki kam haka lynti kaba beit bad kaba khuid,” ong u Lambok haba kren haka jingpynskhem iaki ar tylli ki tnad treikam ka KSU ha West Jaintia Hills haka shnong Madur bad Nongbah haka sngi Saitjain.

“Ki dkhot bad ki nongialam ki dei ban don ka jingmut kaba skhem naba ka ri ka muluk ka donkam iaki samla kiba don ka jingiohi jngai khnang ban lah ban tehsong iaka jingbynriew bad ban iada iaka na ki bor kiba lah ban tyllep bad pynduh jait ia kane ka jaidbynriew rit paid ka jong ngi,” ong shuh shuh u Lambokstar bad wer iaki samla samhoi ban iasoh bad ka KSU bad ula ong ruh ba ka jinglong dkhot haka KSU kam mut tang iaki samla pule, hynrei ia baroh hi kiba dang kren dang pyrkhat iaka eh ka shon jong ka jaidbynriew.

Ka KSU Jaintia Hills District Unit kala thaw iaka Madur Unit bad ka Nongbah unit kaba hap hapoh ka jingpeit ka KSU Jowai unit.

Ha kane ka jingthaw tnad thymmai ka KSU nalor u Lambokstarwel Marngar la iadonlang ruh u Daniel Khyriem president barim ka KSU, Rueben Najiar Incharge KSU Jaintia Hills, Ohibait Dkhar President KSU JHDU, SS Niangti CEC Members, Pynshai Dkhar President NEHU Unit bad kiwei kiwei ki nongialam na kylleng ki tnad treikam ka KSU.

Haka juh ka sngi ka KSU South West Khasi Hills District kala thaw bad pynskhem lai tylli ki tnad treikam ka KSU kiba kynthup ia ka KSU Myriem Unit, KSU Laitumsaw Unit bad ka KSU Mawhiang Unit.

La pynskhem ia ka tnad Myriem Unit, Laitumsaw bad Mawhiang da u Donald V Thabah, General Secretary KSU central body, Erick Nongkynrih, Asst. General Secretary KSU central body bad u Pynshai Rani Publicity Secretary KSU central body haka ingiadonlang ki nongialam bad dkhot ka KSU na kylleng ki tnad ba kynthup iaka Umdohlun, Sawsymper, Balat bad kiwei kiwei.

U Donald v Thabah uba pynskhem iaka tnad Myriem ula ong ba ki nongialam bad ki dkhot ka KSU ki dei ban ieng haka nongrim kaba skhem ban pyrshah iaki jingthmu jongka sorkar ban tih ia u marpoh khyndew Uranium ha Mawthabah bad Domiasiat.

‘Horkit Hordang phim dei ban shah phon shah pah bad shah pynbiej haka surok 2 lane kaba dei tang ka buit sianti jong ka sorkar ban pynbiej ia u paidbah ban ioh khlong ia u Uranium na Mawthabah bad Domiasiat,” ong u Donald.