Ki nongkyrshan ka NPP bad BJP ki kyndit namar ka jingai jingkyrshan ka bym pat ju jia: Ampareen

Syllad | The Rising MeghalayaMarch 26, 2024

Ka kyrtong ka National People’s Party (NPP) na Shillong parliamentary constituency kaba dei ruh ka Myntri sorkar ka Kong Ampareen Lyngdoh haba pdiang sngewbha ia ka jingai jingkyrshan jong ka BJP ia ka NPP ha kane ka ilekshon Lok Sabha ka ban wan, ka la ong, “Nga tip ba ki nongkyrshan jong ka NPP kumjuh ka BJP ki don hapdeng ka jingsngew kyndit namar ngim pat ju sakhi ia kaba kum kane ka kam sain hima shima.”

Haba kren sha ki lad pathai khubor haka 25 tarik Lber, ka Kong Ampareen ka la ong, “Kane ka jingai jingkyrshan jong ka BJP ia ki kyrtong ka NPP na Shillong bad Tura ka wanrah ka jingkyrmen jong ka jingjop namar kane ka dei ka bym pat ju jia koit ba ka BJP kan ithuh ia ngi namar ba ki la iakhun pyrshah ia ngi, hynrei peit mynta ka kam sain hima ka la san pura.”

Ka la ong ruh ba kum kane ka jingkyrshan kan ym wan jia ha ki ilekshon MLA namar ma ki ruh kum ka party kin pyrshang ban jop bun, kata da kaba bynrap ruh ba ka BJP ka la dep ban khein la ka jong ka jingkhein ha ryngkat ka thong ban thaw ia ka sorkar kaba skhem.

“Haba Nga khmih halor ka jingthmu ban ioh ia ka sorkar kaba skhem, ka BJP ka la phah ia ka khubor kaba khlain sha ka Jylla lyngba u Myntri Rangbah bad ki hap ban pynsngap ia ka jingangnud jong ka Jylla bad ia kaei kaba ki nongialam jong ngi ki dawa,” ong ka Lyngdoh.

Halor ki jingkynnoh ba ka NPP bad ka BJP ki dei ki juh, kane ka kyrtong ka NPP ka la ong, “Kito ki ban ym vote ia ka NPP kin ong shibun kiei kiei. Phi la iohi ha ki social media kumno ba ki kawang maw ia ngi. Hynrei, Nga ong ngim dei ban artatien. Ha ka jaka ban thaw ia ka jingiapait iapra ha ka jylla bad ban shah rem ka long kaba biang ba ki (BJP) kin shim ia kaba kum kane ka rai khnang ba lashai haba ngi leit shapoh parliament kin ithuh ia ki MP na Meghalaya, dei namar jong ki, bad ngim shym la pynieng kyrtong. Kumta ruh Nga sngew ba ka la dei lypa ka jingsdang kaba khraw na ka bynta jong ngi.”

Da kaba pynpaw ba kan ym pyniasoh da lei lei ruh bad ka BJP, ka Kong Ampareen ka la ong, “Lada phi ong ba Nga dei ka BJP, Ngan ong ha phi ba Ngan ym long da lei lei ruh ka BJP. Lada Nga kwah ban pyniasoh sha ka BJP, Nga la dei ban pyniasoh sha kane ka party shwa jong ka ilekshon 2023.Ngam lah ban pyniasoh namar Nga la iohi ba katto katne ki rukom pyrkhat kam jong ka BJP ki bym ia iaid ha kaba iadei bad ka bit ka biang jong ki nongshong shnong kiba dei ki trai shnong riewlum.”

“Lada phi kren halor ki jingkynnoh ba ka NPP ka dei ka BJP. Nga kwah ban kylli ia kane ka jingkylli sha ki briew ba ha u 2023 haba ngi iakhun ia ka ilekshon MLA, hato ka BJP kam pynieng kyrtong ne ka iatreilang bad ngi? Ka shap jong ka BJP ka dei u syntiew Lotus, ki don la ki jong ki rukom treikam kiba iapher shibun na ki rukom treikam jong ngi,” ka la ong da kaba bynrap ruh, “Ngi kum ki trai shnong riewlum na ka thain North East ngi sngew donbok shibun ba ka BJP ka la ai ka jingithuh ia ngi bad ai ia ngi ka jaka kaba kyrpang. Kumta ai ba kin kynnoh, lada kim kynnoh kumno kin iakhun ia kane ka ilekshon, hynrei na ka bynta ki paidbah kiba kyrshan ia ngi, sngewbha wat sheptieng, wat khynniuh bad wat sngew artatien.”

Nalor kata ka la ong ruh ba ka HSPDP ruh ka la iatreilang bad ka UDP bad iakhun pyrshah ia ka NPP ha kane ka ilekshon hynrei kata kam mut ba ka HSPDP ka la jah rngai noh bad ba ka don tang ka UDP. “Ki don ia ka jingiatreilnag bad kata kam mut ba ka HSPDP bad ka UDP ki dei ki juh.Tang namar ba ki iatreilang ha ka MP ilekshon, phi tharai ba ka MDA 2 ka ia pait. Em, ngi burom iwei ia iwei,” ka la ong shuh shuh.

Shuh shuh haba kylli, kane ka kyrtong ka NPP ka la ong ba shwa ka jingshim rai jong ka BJP ban kyrshan ia ka NPP, ka la dep lypa ban leit iakren bad ki briew ka BJP, UDP, HSPDP, KHNAM bad ruh ka TMC.