Ki nongniah kali ki dei ki nongrah ktien

Syllad | The Rising MeghalayaFebruary 12, 2019

JOWAI: “Ki nongniah kali kamai ki dei ki nongrah ktien la ka dei kaba bha ne kaba sniew”, la ong u Pastor HH Mohrmen. Ula ong ba ki briew kiba wan na kiwei kiwei ki jylla bad kiba nabar ri, lada ki nongniah kali ki long kiba bha bad kiba lah ban ai jingshakri kaba pura ïaki nongwan nongleit khlem pep kin rah ka khubor sha ki shnong ki thaw jong ki ban pynsaphriang ïaka khubor ba bha.

U Pastor Mohrmen ula ong ki nongniah kali kamai ki dei ki nongai jingshakri ïa u paidbah bad ban pynpoi ïa u nongleit nongwan sha kaba jaka kaba thmu ban leit. “Ki nongniah kali kamai, ka kam jong ki kadei ban ai jingshakri ïa u paidbah kum u Pulit, Doctor bad lada kim don ki nongniah kali kamai baroh ki nongshong kali kin sahkut ne neh ha juh”, la ong u Pastor haba kren haka jingrakhe ïaka ‘4th Driver’s Day’ kaba la rakhe da ka West Jaiñtia Hills Taxi Owner’s and Driver’s Association (WJHTODA) kaba long ha Indoor Hall ka dong Chutwakhu, Jowai haka sngi Ba Ar.

Ha kane ka jingrakhe ka sngi kyrpang ki nongniah kali, la ïadonlang u Additional SP (Crime) u Bah P Syiem uba long kum u kongsan, u symbud kongsan u DTO ma Ricky Tariang, ki nongialam jong ka WJHTODA, East Khasi Hills Taxi Association, Local Taxi Association Nongstoin bad ki synjuk ki Indica bad Sumo.

U Kongsan bad Symbud Kongsan kila kyntu ïa nongniah kali ban bud ïaki aiñ niah kali bad long kiba phikir haba niah kali ban lait na kino kino ki jingma jingmynsaw.

Shuh Shuh u Pastor Mohrmen haba kren ula ong ka kam kamai kali ruh ka dei kawei na ki lad ban kamai ja kpoh bad ka kyntiew ruh ïaka ïoh ka kot ka Jylla bad ka ri.

Ka jingthmu bala rakhe ïa kane ka sngi kyrpang ki nongniah kali ka long ban wanrah ka jingïajan jong ki nongniah kali ha kylleng ka jylla bad ban iamir jingmut ïa ki kam ba iadei bad ka niah kali bad ba iadei bad ki aiñ naka bynta ban tei bad ban kyntiew shaphrang ïaki ki kam ki synjuk niah kali.