Ki nongthep vote ka Nartiang ki dei ki ‘Genius’ bad kin pynjop biang ia nga: Sniawbhalang Dhar

Syllad | The Rising MeghalayaNovember 12, 2022

U Myntri kam pynroi sor Ma Sniawbhalang Dhar ula ong ba ula wanrah haduh T 550 klur na ka bynta ki kam pynroi pynpar ha Nartiang Constituency.

U Ma Sniawbhalang ba kane ka pisa kaba la wanrah ka kynthup iaka jingtei iaka Stadium ha Wahiajer kaba la kot T 38 klur, ka Jal Jeevan Mission T 220 klur bad ka jingshna surok hapoh NArtiang Constituency T 200 klur nalor kiwei kiwei ki kam pynroi.

U Ma Sniawbhalang haba kren shuh shuh haka jingialang pynskhem nongkitkam ka NPP Nartiang Block Committee ha Iawpynsin, Wahiajer haka sngi Thohdieng, ula ong ba kane ka jingwanrah iaka kam pynroi ka dei ba u angnud ban shakri kaba bha tam bad ban pynkylla dur iaka Nartiang Constituency baroh kawei.

Ula put turoi iaka sorkar MDA kaba la ialam daka NPP ba ka dei ka sorkar kaba nud ban shim iaki ishu kiba eh bad kiba jyrwit jyrwat, katta ka dei jingpynbeit ia u pud u sam ka Jylla Meghalaya bad ka Assam.

Ka thong jong kane ka sorkar ka dei ban shakri ia u paidbah bad ban pynjem iaka jingeh u paidbah haki liang baroh, la ong u ma Sniawbhalang bad ula ong ba ha u snem 2014-18 ka sorkar kala pynlut T 8787 klur bad ha kane ka samoi ka sorkar MDA naduh u snem 2018-22 ka jingpyllut ka long T 13205 klur, la ong u ma Sniawbhalang.

Ula ïathuh ba na ka bynta ka skhim MHIS ka sorkar MDA ka la kyntiew na ka 2.8 lak tyngka sha ka 5.3 lak tyngka.

“Ki paidbah nongthep vote jong ka Nartiang Constituency ki dei ki genius ne kiba stad namar kin ai jingkyrshan pura ïa nga bad pynjop biang ïa nga ha u 2023.

U spokesperson jong ka NPYF u Bajop Pyngrope ula ong ba u Ma Sñiawbhalang ua dei uba tbit haka liang ka politic bad u dei u PhD ha ka politics namar u la jop haduh lai sien lai wat bad u thikna ruh ba ha u 2023 u Bah Sniawbhalang un sa wanphai sha ka bor.

U la ong haka seng NPP kam don ka jingïaknieh ticket kumba long ha ka seng Congress mynshwa, hynrei mynta ka ka party Congress ka hap leit khroh briew kylla ban ïakhun elekshon.

U Ma Thombor Shiwat uba long u Chief Executive Member ka JHADC ula kop ba Ma u Sñiawbhalang un jop kput ha u snem 2023 kumba u jop ha u snem 2013 bad kane kadei namar 60 percent ki nongkyrshan Congress ki la wan ïasoh bad ka NPP.

Kiwei kiwei ki nongkren kiba kynthup ia u MDC ka Moodymmai u Ma Jesse Suiam bad u Ma Briwon Pohshna ki la ïaroh ïaka jingtrei borbah jong u Ma Sñiawbhalang bad ki la kop ba palat 80 percent ngut ki nongthep vote na ka thaiñ jong ki kin jied ïa u Ma Sñiawbhalang.

Ha kane ka sngi la ïoh ïaka jingpynskhem ïa ki nongkitam jong ka NPP Nartiang Block Committee bad ki nongkitkam ki long u Hamkom Khynriam President, u Joseph Pariat Vice- President, u Mutshwa Thabah General Secretary, Banker Siangshai Assistant Secretary, Sñiawbhalang Dhar Tresurer, ki Adviser ki long u Briwon Pohshna, Pheinchwa Nanglein, Thombor Shiwat, Jesse Suiam bad kiwei kiwei.

Ïa kine ki nongkitkam la pynskhem da u MLA ka Jowai uba long u president jong ka NPP West Jaintia Hills District u Ma Wailadmiki Shylla haka jingdonlang u MLA ka Mawhati uba dei ruh u myntri sorkar u Ma Dasakhiat Lamare, u Ma Ngaitlang Dhar haka jingïalang kaba la pynïaid da u Ma Hamkom Khynriam President NPP Nartiang.