Ki nongtrei bar jylla haki kharkhana sain rnga dewiong kim don labour laisen na JHADC

Syllad | The Rising MeghalayaNovember 8, 2024

Kalong sngew lyngngoh ba haduh mynta ym pat don satia wat tang u wei u nongtrei bar jylla u ba trei haki karkhana shna coke (sain rnga dewiong) kiba don ha rilum Jaintia u ba la wan shim ia ka non tribal employees service licenses ne ka labour laisen na ka Jaintia Hills Autonomous District Council (JHADC).

Ia kane la iathuh da u Chief Executive Member jong ka JHADC u Ma Thombor Shiwat haba jubab ia ka jingkylli bala wanrah da u MDC jong ka Raliang u Ma Robinus Syngkon ha Dorbar Tlang jong ka JHADC ha ka Sngi Palei mynta ka taiew.

U Ma Shiwat u la iathuh ka Council kam shym la ai ia ka non tribal employees service licenses ia kino kino ki nongtrei bar jylla kiba trei haki karkhana shna coke ha East Jaintia Hills District ne West Jaintia Hills District naduh 1 tarik u bnai Iaiong jong u snem 2023 haduh 30 tarik u bnai Nailur snem 2024 namar ba kim shym la wan shakhmat ban register ialade.

U Ma Shiwat u la pynshai ba ki ophisar bad nongtrei ka JHADC ki leit jurip ia ki kharkhana shna coke ha ki por mynsngi kumta kim shym lap satia ia uno uno u nongtrei bar jylla ha kitei ki kharkhana shna coke. Ula bynrap ba na ka liang jong ka Council ka la dep bthah ia ki trai jong ki karkhana shna coke ba ki dei ban wan shim noh mardor ia ki non tribal employees service license.

Ha kawei pat ka jingkylli u MDC jong ka Jowai Central u Ma Andrew Shullai u la kylli hato ka Sorkar Jylla ka la ai ne em ia ka jingmynjur ne jingithuh ia ki dak Pnar ba la ithuh da ka JHADC.

Na ka liang jong u Executive Member jong ka JHADC u Ma Phasmon Dkhar u la iathuh ba ka Council kam shym la phah ia kitei ki dak Pnar sha ka Sorkar Jylla ban ioh jingithuh ne jingmynjor hynrei dei tang ban pynmih ha ka Gazette jong ka Meghalaya bad ka Sorkar ka la dep pynmih ha ka 11 tarik u bnai Nailar, snem 2022.

U Ma Shullai u la pynpaw ia ka jingsngewlynngoh namar ba ki Dorbar bala dep u Executive Member u la iathuh ba ka Council ka dang ap ia ka jingmynjur ia ki dak Pnar na ka tnat Law jong ka Sorkar Jylla.