Ki Nurse ki don ka bynta kaba kongsan ban pynkoit ïa u nongpang

Syllad | The Rising MeghalayaMay 11, 2019

SHANGPUNG: “Ki Nurse ki don ka bynta kaba kongsan na ka bynta ban pynioh ïaka jingkoit jingkhiah kaba pura ia u nongpang,” la ong u ma Comingone Ymbon, Myntri ka tnad Fisheries bad kiwei.

“Ka kam nurse kadei kaba eh, hynrei ka dei thymmei jong ka lad ai jingsumar ïa kiba pang ba shitom, kumta phi (nurse) dei ban ai ka jingshakri kaba bha tam ïa u nongpang ban ioh ka jingkoit jingkhiah ba pura,”la kyntu u ma Comingone haba kren kum u kongsan haka jinglehkmen Nurses Week ha Auditorium jong ka Shangpung Pohshnong haka sngi Saitjaiñ

Ïa kane ka Nurses Week la pynlong da ka synjuk Trained Nurses Association of India (TNAI), Jaiñtia Hill Unit bad phang pdeng ka dei “Nursing: The balance of mind, body and Spirit”.

La ïadonlang u Dr. Batkupar Nongkhlaw, Medical Officer Shangpung PHC, MDC Shangpung u J Treilang Suchiang haka jingialang kaba pyniaid u Jesper Nomgrum, Staff Nurse Jowai Civil Hospital.

Ka Kong C Pohdweng, Sister Tutor, Dr. NTG Nursing School Jowai haka jingkren kala pynshlur ïaki nurse ban bud iaki kam shlur bad nuksa ba bha ka Florence Nightingale, ka nurse ka pyrthei shai mynta kaba la aiti ïaka jingim jong ka ban sumar iaki shipai kiba la mynsaw haka thma Crimean War ha Europe.

La sdang ïa kane ka jinglehkmen da kaba thang ïa u mombati bad ka la don ruh ka jingai memento sha ki nurse kiba la shongthait na ka kam.