Ki ophisar JHADC kiba im pahuh pahai, iaid sahuh ki trok dewiong bad masi naka 2500-5500; kynthoh u CEM barim Madonbai Rymbai

Syllad | The Rising MeghalayaJanuary 14, 2025

U Chief Executive Member barim jong ka Jaintia Hills Autonomous District Council (JHADC) u Ma Madonbai Rymbai ula kynthoh ba don katto katne ngut ki ophisar jong ka JHADC kiba im pahuh pahai ne Luxurious kumba ong ha ka ktien nongwei wat hapdeng ka jingbym ioh tulop da ki phew bnai katba kiba bun ngut ki ophisar bad nongtrei jong ka JHADC ki im kordit bad sah ram na ka daw ka jingbym ioh tulop da ki snem.

U Ma Madonbai ula kren kynthoh iaki ophisar ka konsil, haba kren haka jingialang bala pynlong ha CTC Orchid Inn Thadlaskein haka jingpynithuh iaki kyrtong jong ka Congress party ban iakhun ia ka Election MDC haka 14 tarik K’lyngkot.

U CEM barim jong ka JHADC ula ong ba 5500 tylli ki trok ki iaid man ka miet ha surokbah National Highway ban kit dewiong ne kit masi ne kit dieng hynrei ka Executive Committee bala ialam da ka NPP ha JHADC kam lah ban siew tulop iaki nongtrei da ki bun tylli ki bnai.

Ula kob ruh ba haka por ba long CEM ma u, ki nongtrei JHADC kim ju duh tulop, “Ha ka por ba dang long CEM ma nga ha ki snem 2018-19 tang 2500 tylli ki trok ki iaid man ka miet, hynrei man u bnai nga lah ban siew tulop ia ki nongtrei jong ka JHADC.”.

U Ma Madonbai u la ong ba ka jingbym ioh tulop ki nongtrei jong ka JHADC da ki bun tylli ki bnai mynta ka dei na ka daw ka jingphiel jong ka Executive Committee synroplang jong ka NPP bad UDP. Ula ong kaba sngewlynngoh ka long ba kajuh ka party ka synshar ha Delhi bad Shillong kumjuh ha Jowai hynrei kam shym lah satia ban siew tulop ia ki nongtrei jong ka JHADC.

U Ma Madonbai uba long kyrtong jong ka Congress party na ka Amwi Khliehtyrshi Konstituensi ula ban biang ba ka Executive Committee kaba mynta jong ka JHADC ka la lilam iaka jingpyniaid jong ki Forest Beat House jong ka JHADC sha ki riew shimet bad lada kine ki party ki neh slem ban synshar khlem pep kin pynkylla shopping mall ia ka ophis treikam jong ka JHADC.

U la ong ruh ba ka Congress Party ka la wanrah shibun ki roi ki par ha ka jylla Meghalaya bad ka Congress Party ka long ka party kaba long Secular ne ka bym peit niam bad kumta u la kyntu ia ki nongtrei jong ka party ban trei shitom khnang ba ka party kan jop bun seat na JHADC.