Ki paidbah ba shong ha khappud kin ioh beit iaka hok ban thep ia ka vote: Chief Election Commissioner

Syllad | The Rising MeghalayaJanuary 13, 2023

U Chief Election Commissioner ka ri u Rajiv Kumar u la ong ba ka jingthep vote da ki paidbah nong shnong ka jylla kiba don ha ki shnong khappud Assam Meghalaya kan iaid beit kumba ka dei ba kan long.

U Kumar ula ong ia kane haba jubab ia ka jingkylli ha ka jingiakynduh bad ki lad pathai khubor ha ka jingwan jurip ba arsngi ka kynhun ka Election Commission Of India ia ka Meghalaya, kaban khreh ban leit sha ka jingjied ia la ki nongmihkhmat sha ka iing dorbar thaw ain kaban long shen.

U Kumar u la ong ba ia kane ka kam, la bynshet bad aitui ruh ha ki heh ophis bad ki DGP jong ki ar jylla ba kin shimkhia ban khmih baki paidbah ba don ha ki bynta ka khappud ba kim nym don kano kano ka jingeh ne jingshah pyndik ban leit ha kaban pyndep hok ia la ka kamram ban thep iaka vote ka jong ki ha kane ka kynti kaba mynta.

Ha kaba iadei bad ka jingkynnoh jingkhring iaki nongthep vote da ka NPP bad ka AITC lyngba ka FOCUS bad ka We Card schemes, ula ong halor kane ka jingpyrshang ki seng sain hima sima ban kular bad khring iaki nongthep vote, kadei ka hok jong ki, hynrei ka shong ruh ha ki nongthep vote ban tip ia kaei kaba kular bad ki ioh ne em ia kaei kaba la kular bad kine ki seng sain hima sima ki lah ne em ban pyntreikam.

Hynrei ia mynta ym pat lah ban leh eiei bad marsien treikam ka MCC kan peit kaei kaba dei ban leh bad bym dei kiba shah ka aiñ, la ong u Kumar

Kumba iatip ba ka samoi treikam jong ka iing dorbar thawain kaba mynta kan poi noh sha kaba kut haka 15 tarik u Lber 2023.

Ha kane ka jingwan kaba ar sngi, na ka liang u Chief Election Commissioner u  Rajiv Kumar, la synran lang ia u da ki arngut ki Election Commissioner katta u  Anup Chandra Pandey bad u  u Arun Goel, ha kaba ki la ioh ia ka lad ba kin ia mir jingmut bha  bad ki ophisar jong ka jylla, ba kynthup naduh u Chief Secretary, u DGP, u Chief Electoral Officer ka jylla, nangta ki heh pulit bdd shipai kiba don hangne ha ka jylla, ban ia ai ia la ki jingmut da kumno ban lah ban pynlong ia ka elekshon kaba iaid beit ba iaid ryntih, bad khamtam lei lei haba iadei bad ka  jingmih ban iashim bynta shit rhem jong ki paidbah.

Na ka liang u Chief Election Commissioner lem bad ki arngut ki Election Commissioner ki la ioh ia ka lad ban ia shem ia kynduh ia ki seng sain pyrthei, ka ri, ka thain bad jong kane ka jylla, ha kaba ki la sngew bad sngap bad ai ruh ia ki mat ban pynshai kaba la buh hakhmat jong ki da ki nongmihkhmat ki seng sain pyrthei.

Ha kane ka kynti ki don 21,61,729 ki nongshong shnong ka Jylla kin jied ia ki nongmihkhmat  bathymmai, bad ki nongthep vote kynthei ki don haduh 10,92,326 hajar bad ki khamtam ban ia ki shynrang kiba don 10,68,801. Ha ka rta kaba 18-19 snem ne kiba ioh thep vote nyngkong ki don 81,443, bad kiba la palat ia ka 100 snem ki don 290 ngut.

Kiba don haka jingduna bor met ne PwD 7478 bad kiba la kynjoh 80 snem shaneng ki don 22658.