Ki phra tylli ki project surok ba palat 5000 klur kin pynkylla dur ia ka Jylla Meghalaya: Dy. CM

Syllad | The Rising MeghalayaJanuary 18, 2025

U Symbud Myntri Rangbah uba khmih ia ka Tnad PWD (Roads) u Bah Prestone Tynsong ha ka 17 tarik Kyllalyngkot u la khot pynlong ia ka jingialang bishar kam halor ka jingpynkhreh ban pyntrei ia ki phra tylli ki project surok ba kongsan ka Jylla kiba kot haduh palat T.5000 klur.

“Nga sngewkmen shibun ban pyntip sha baroh ba ka jngiaid jong ka kam ka long kaba iaid beit iaid ryntih,” ong u Bah Prestone haba kren sha ki lad pathai khubor hadien ka jingialang.

U la ong ruh, “Ym pat ju don ki sorkar ha ka histori jong ka jylla Meghalaya naduh u snem 1972 haduh mynta, hynrei dei tang kane ka sorkar naduh u snem 2018 haduh mynta kaba la wanrah ia kiba kum kine ki project.”

“Kumta ruh ngi kwah ban pyndep kham kloi ia baroh kine ki project namar kin long shisha ka jingkyrkhu kaba khraw ia ki paidbah bad ia ka Jylla hi baroh kawei,” u la bynrap.

Kine ki phra tylli ki project surok ba kongsan ki kynthup ia ka Dainadubi-Darugre road ba (40km) ha ka jingmang kaba T. 705.83 klur,  surok Darugre sha Williamnagar (36 km) T.801 klur, surok Tura-Dalu (51km) T. 610 klur, surok Nongstoin-Rambrai-Kyrshai  (33km) T. 359 klur, Shillong Western bypass package 1 is (12.8 km) T. 620 klur, package II (11.90km) T. 686 klur bad  package III (13.55 km) T. 562 klur, surok Shillong Dawki T. 1200 klur, Tura Bypass T. 943 klur bad ka surok High Speed Corridor na Mawlyngkhung (Na Fly Over, Umiam Lake sha Panchgram ha Assam ).

“Na ka bynta ka High Speed Corridor project ia mynta ka jingleh ia ka sorbe bad ka jingiakren bad ia pynbeit bad ki Rangbah Shnong ka dang iaid shakhmat. Ngin sa ioh ia ka jingtip kaba bniah halor ka mangtyngka tad hadien ba la pyndep ia ka DPR,” u la ong.

Haba pynpaw ba ka jingioh jaka ka dei ka jingeh kaba khraw na ka bynta kine ki project surok ba kongsan, u Bah Tynsong u la ong, “75 percent na kane ka jingialang bishar kam la pynlut por ban iakren halor ka mat kaba iadei bad ka kam thied jaka.”

“Nga sngewkmen ban pyntip sha phi ba ba bishar bniah ia baroh kine ki project..Nga la bthah ia baroh ki tnad ba dei khmih ba kin pynsted ia ki jingtreikam namar ngi kwah ban pyndep noh kham kloi ia kine ki project khnang ba kin long da shisha ki jingkyrkhu ia ka jylla Meghalaya,” u la ong da kaba bynrap, “Kumta nga ong ngi don ia ki project kiba biang bha ha kylleng ka jylla bad nga thikna ba hapoh kine ki khyndiat snem naduh mynta ngin iohi ia ki jingkylla ki ban sa wan hapoh ka Jylla.”

Haba kylli halor ka jingiaid jong ka project surok Shillong-Dawki, u Dy.CM u la ong, “Hooid, peit ia ka song I, II, IV bad V I, nga sngewkmen shibun ban pyntip sha phi ba ki kam ki la iaid shakhmat bad kaba pynhun, hynrei ki don katto katne ki khep ha kaba ki trai jaka ki ong em, phim lah ban leh, phi lah ban sangeh ia ka kam namar ngam pat shym la ioh ia ka jingsiew halor ka bai jaka.” U pyntip ruh ba ia ka surok Shillong-Dawki yn sa pyndep noh hapoh u snem 2026.

“Na ka bynta ka song III, ngim don kano kano ka jingeh, ka song III ka dei ka Pynursla Bypass bad kane ka Bypass mynta ka sorkar India ka la dep ban mynjur ia ka DPR bad kane ruh ka la kot sha kumba T.564 klur,” bynrap u Bah Tynsong.

Nalor kata u Dy.CM u la ong ba ka project surok Corridor Expressway kaba poi shaduh Silchar la mang ha ka jinglut ka ban kot haduh T.25000 klur, kata kynthup ia ka jingsiew bai jaka kaba treikam sha Assam bad Meghalaya.U la ong ruh ba tang ha Meghalaya la dep ban mang kumba T.15000 klur.