Ki project ba T.4000 klur kin wanrah ka jingkylla ba khraw ha ka kam jngohkai ha ka Jylla: Paul

Syllad | The Rising MeghalayaFebruary 20, 2025

U Myntri ka Tnad kam jngohkai u Bah Paul Lyngdoh u la ong ba ka jingpyntrei ia ki project bapher bapher kiba kot haduh T.4000 klur kin wanrah ka jingkylla kaba khraw ia ki kam jngohkai pyrthei ha ka jylla Meghalaya.

Haba kren sha ki lad pathai khubor ha ka 20 tarik Rymphang u Bah Paul u la ong ba kine ki project ki kham bun ha kaba iadei bad ki jingtei.

“Kumjuh ruh ka jingbei tyngka kaba kham bun ka long na ka bynta ki jaka jngohkai kiba kham pawkhmat, kiba kynthup ia ka Umiam, Sohra, New Shillong, Dawki bad ha Rilum Garo,” u la bynrap.

Une u Myntri u la ong ruh ba ka pisa kaba kot haduh T.4000 klur ka dei kaba la iakhleh lang ia ki project ba la bei da ka sorkar Jylla, ka jingbei kaba 90:10 na ka Ministry of Tourism bad katto katne na ki Externally Aided Project (EAP).

“Kan shim por kumba ar snem ban pyndep ia baroh kine ki project bad katto katne na ki namar ka aiom treikam ha Meghalaya ki lah ban shim por palat ia kawei ka snem mangtyngka,” u la ong.

Haba kylli, u Bah Paul u la ong, “Kane kan dei ka sienjam ka ban wanrah ia ka jingkylla kaba khraw. Kum ka nuksa ka Dawki, ka dei kawei na ki jaka kaba bun tam ki nongwan jngohkai haba phai sha ki kam jngohkai bad ha ki kam khaii pateng, hynrei haduh mynta ngim pat don satia ia ki jaka sahkai kiba biang. Kumta hadien ba ngi la lah ban pynbiang ia ki jaka sahkai ha kum kine ki jaka ki briew kin kwah ban pynlut ia ka por bad ban sah katto katne por ha kine ki jaka, bad da ka jingpynheh ia ka surok highway sha ka four lane, kane kan nang pynkhlain bad kyntiew shuh shuh ia ka jylla ha ki kam jngohkai bad ka kam khaii pateng.