Ki pulit Meghalaya kim shym la phet krad kumba la paw ha ki social media, ki kiar na ka jingiakynad: SP

Syllad | The Rising MeghalayaAugust 27, 2023

Ki bor pulit ka jylla Meghalaya kim shym la phet krad satia na ka jingtieng ia ka jingbeh thong ki paidbah Karbi kumba la sakhi ha ki social media, hynrei ka jingphet ka jong ki ka long ban kiar na kano kano ka jingiakynad kaba lah ban mih ha ka jaka kaba ki Karbi ki la kam ba ka dei ka ba dang hap hapoh u pud u sam jong ka jylla Assam, ong u Superintendent of Police ka West Jaintia Hills District, Ma C Syrti.

Une u heh pulit u la ong ruh ba kine ki bor pulit ka jylla ki la leit sha katei ka jaka na ka bynta ban pynlong ka jingtohkit hadien ka jingioh jingtip halor ka jingshna jong ki pulit Assam ia ka sem jaka shong ha ka jaka kaba ki nong Karbi ki la kam ba ka dei kaba hap hapoh u pud u sam jong ka jylla Assam bad ia kaba ki nongshong shnong ka Lapangap ki la kam ba ka dei kaba dang hap hapoh u pud u sam jong ka Meghalaya.

U la ong ruh ba ki paidbah na ka liang ka Assam ki la wan tur beit beit sha ka jaka ba don ki bor pulit bad dawa ba ki dei ban mih noh na kane ka jaka namar ka dei kaba dang hap hapoh u pud u sam jong ka jylla Assam.

Hadien kine ki paidbah ki la pynpaw ia ka jingkhih bitar bad sdang ban ther maw bad pyndonkam ruh da ki jri ban pynher krad bad behthong ia ki pulit. Halor kane ka bynta kam shym la don satia kano kano ka jingkdew shai kano ka bynta ka dei kaba shapoh Assam bad kano kaba hap shapoh Meghalaya, bad na ka liang ki pulit ka jylla ki la phet noh sha kham sha pajih bad kim shym la pyndonkam bor khnang ban kiar na kano kano ka jingjia kaba lah ban mih.

Hadien kane na ka liang kine ki paidbah na Assam ruh ki la ieng noh shala ka jong ka jaka kaba ki la kam trai bad sangeh ban behthong ia ki pulit. Hadien kane la pyntip sha ki pulit ka Assam kiba la wan poi mardor sha kane ka jaka ban tehlakam ia kine ki paidbah sha ka liang ka jong ki.

Kumjuh na ka liang ki pulit ka Meghalaya ruh ki la kyntu ia ki paidbah kiba don sha ka liang ka jylla ba kim dei ban leit tur sha katei ka jaka kaba don hapdeng ka jingiapher jingmut.