Ki Rai ka Dorbar Shnong Mynthong, Jowai kiba iadei bad ka Election MDC

Syllad | The Rising MeghalayaFebruary 5, 2025

Ka Dorbar Shnong Mynthong kala rai ban buh da ka kyndon ha kaba iadei bad ka jingialap elekshon MDC 2025 na ka bynta ki kyrtong sha ka Jaintia Hills Autonomous District Council (JHADC). Kane ka sienjam ba ka Dorbar Shnong kala shim ka dei na ka bynta ban wanrah iaka miat ka bha, ka shongsuk shongsain bad ka khuid ka suba hapoh shnong poh thaw.

Kine harum ki long ki rai jong ka Dorbar Shnong Mynthong ba ki kyrtong ki dei ban bud ryntih:

• Yn shah ban pynlong Jingialang Canvas Election tang hapoh ka Community Hall jong ka Dorbar Shnong Mynthong. Ym shah ban pynlong Election Meeting ha kiwei pat ki Jaka Paitbah/Madan/Hall hapoh u pud u sam ka Shnong Mynthong.

• Ki Candidate lane ka Party kin hap ban ioh permissioin na ki Bor District Election hashwa ban pynlong Meeting.

• Ia ka meeting yn pyniaid da u Waheh Shnong, Dorbar Shnong Mynthong. Lada jia ba u Waheh Shnong um lait yn sa aiti ha uwei na ki Office Bearers jong ka Shnong.

• Ha ka sngi pynlong Meeting yn shah tang 5 tylli ki Kali ban rung shapoh ka Shnong kynthup ia ka Kali jong u Candidate.

• Yn shah tang 10 ngut ki ban wan Canvas Election nabar Shnong, kata u Candidate bad 9 ngut kiwei pat ki ban synran ia u.

• Yn shah tang 5 ngut ki ban kren ha ka Jingialang kata u Candidate bad 4 ngut kiwei pat.

• Ym shah ia kiba nabar Shnong ban wan sha ka Election Meeting. Tang ki Nongthep Vote (Voters) jong ka Mynthong Polling Station kiban lah ban wan sha ka Election Meeting.

Ka Dorbar Shnong Mynthong ka kyrpad bad khmih lynti ia ka jingiatreilang jong baroh ki Candidate ha kane ka bynta na ka bynta ka bha ka miat, ka shongsuk shongsain bad ka khuid ka suba hapoh ka Shnong ka Thaw.