Ki Rangbah Shnong kim dei ban tieng ia ki jingbyrngem ka VPP; la pynkup bor iaki da ki ADC: Prestone

Syllad | The Rising MeghalayaFebruary 10, 2025

U President ka National People’s Party (NPP) Meghalaya uba dei ruh u Symbud Myntri Rangbah, u Bah Prestone Tynsong ha ka 8 tarik Rymphang u la kyntu ia ki Rangbah Shnong ba kim dei ban tieng ia ka jingshah byrngem ba dang shen ha kawei ka seng sain pyrthei (VPP) namar ia ki la pynkupbor da ki Autonomous District Council (ADC).

Ia kane u la pynpaw ha ka rynsan ialap elekshon ha Laitlyngkot-Nongkynrih ban pan jingkyrshan ia la u jong u pyrsa uba dei u kyrtong jong ka NPP na Langkyrdem-Laitkroh constituency u Bah Rahboklang Tynsong.

U Bah Prestone u la ong ba ki don ki seng sain pyrthei kiba la byrngem ban ujor ia ki Rangbah Shnong sha ka iingbishar tang namar ba kim shym la aijingbit satia ban pynlong ia ki jingialang paidbah ban ialap elekshon.

“Nga sngew synei na ka bynta baroh ki Rangbah Shnong, hynrei nga ong ha phi ba ka ain ka don ban iada ia phi, sngewbha ban tieng namar phi dei kiba la ioh bor pura na ki District Council” ula bynrap.

Haba kdew halor ka jingjia ha Mawlai, u Bah Tynsong u la ong, “Nga pang ka mynsiem haba nga peit ia ka Mawlai Town Dorbar. Hadien ba la ioh ka jingujor na ki kmie ki kpa jong ki khynnah pule, ki hynriew ngut ki kyrtong na Mawlai constituency ha ryngkat ka MTD ki la rai lang ban ym shah pynlong ia ki jingialang paidbah namar kan pynthud ia ki khynnah pule kiba dang pynkhreh ia ki eksamin bapher bapher. Hynrei, sngewsih ba la pynbud ia kane da ka jingbyrngem ha ka sngi kaba bud. U nud ban byrngem kat ia ki Rangbah Shnong ki bym shym la ioh wat ia ka jingsiew ban ai ka jingshakri.”

Haba ther kylla ia ka jingthmu ban mudui ehajar pyrshah ia ki Rangbah Shnong, une u nongialam ka NPP u la ong, “Sangeh ka jingkdew kti ia kiwei bad peit shwa ia la ki jong ki jingduna.”

“Nga kyrpad ia ki nongshong shnong ka Nongkynrih Laitlyngkot ba kim dei ban shah pynbiej ha kiba kum kine ki party,” u la bynrap.

U Bah Prestone u la ai ruh ka jingiaroh ia ka KHADC da kaba ong, “Ngi la nangpynkup bor shuh shuh ia ki Seng Kynthei bad Seng Samla hapoh ki shnong ki thaw. Kane ka ain ka dei kaba la thaw da u CEM ba mynta u Bah Pyniaid Sing Syiem ha ryngkat ka jingiamir jigmut bad nga lem bad ki ophisar ka sorkar Jylla.”

Haba kam ba ka sorkar ba la ialam da ka NPP ka la kyntiew bad pynbha ia ki surok hapoh ka jylla, u Bah Prestone u la ong, ” Kane ka pyni ia ka jingieid ba shisha ia ka jaidbynriew ym kum kito kiba nang tang ban shu kular katba ha la ki jong ki constituency ka jinglong jingman ki surok kim i long shuh wat tang ban iaid ki kali kulai. Kumta ki paidbah kim dei ban shu ngop ha ki jingpynbiej jong kine ki party.”

Shuh shuh u la kular ruh ba ka NPP kan pynthikna ban ai ka jingiada kaba pura ia ka hok bad ki jingmyntoi jong ki paid riewlum kiba dei ki trai muluk lyngba ki District Council.