Ki samla ki dei ban nang ban pyndonkam ia ki rynsan social media ym ban ngop ha ki kamkai, ong u Donald

Syllad | The Rising MeghalayaOctober 22, 2023

Ki samla kim dei ban ngop ha ki rynsan social media bad pynsyrwa kai ia ka por, hynrei ban pyndonkam ia ki ha kaba wad bniah ia ki jingtip ki ban iarap ha kiba bun ki liang kiba tei ia ka jinglong jingim, ong u General Secretary ka Khasti Students’ Union (KSU) u samla Donald V Thabah haba kren kum u Kongsan ha ka jingialang pyntian smai ia ki nongkitkam jong ka KSU Wapung Unit bad pynkup burom ia ki khynnah kiba pass bha ha ka 21 tarik mynta u bnai hapoh Community Hall Wapung Shnong, East Jaintia Hills District.

Nalor kata u la kyntu ruh ia  ki khynnah samla ba kin dang ïai bteng ban trei shitom ha kino kino ki bynta jong ki jingpule bad na ka liang ka seng ka ai ka kti kamon kti ka diang na ka bynta  ki samla kiba donkam jingïarap.

Ha kane ka jingialang la ia don lang ruh ka samla Pynshai Rani Publicity Secretary KSU-CB kum ka symbud Kongsan, nalor  ki nongialam ka KSU East Jaintia Hills District Unit Kynthup ia u President Streamly S Suchen, Cherity Suja Asst Finance Secretary  KSU EJHDU, Shaniahskhem Dkhar Finance Secretary KSU EJHDU bad Ki Principal jong ka K.B Memorial Secondary School Mr Heipor Uni Bang bad I Head Mistress jong Wapung Shnong Sein Raij L.P & U P School.

Ha kane ka jingialang ba la pyniaid da u Samla Pynshai Kupar Dkhar Assistant General Secretary KSU EJHDU la ioh ruh ban pynsngew ia ka khana lyngkot jong u Woh Tep Kyndait u Khlawait na ka thaiñ Tuber na u Ma Helping Phawa u nongaibuit ka Sein Raij Tuber  ha ka jingwan sakhi lang da kmie ki kpa ki rangbah bad ki nongkitkam ka Shnong Wapung Shnong.

Ki nongkitkam bathymmai ka KSU Wapung Unit ki kynthup ia u president u Deiniwan Lyngdoh, Vice President Shibaitlang Rymbai, General Secretary Hamewanpynhun Ryngkhlem, Assistant General Secretary Janki Ryngkhlem, Finance Shwari Ryngkhlem, Assistant Finance Smatlang Siangshai, Environment Hamieh Dkhar, Organising Secretary Nicholas Rymbai, Assistant Organising Jomi Kyndait, Education Secretary Lucky Rymbai, Assistant Education Secretary Phulmi Dkhar, Sports Secretary, Senmon Siangshai, Assistant Sports Emiwanpynthrang Ryngkhlem, Publicity Secretary Victory Phawa, Assistant Publicity Secretary Pynibha Myrchiang, Office Secretary Nibalson Ryngkhlem bad Discipline Secretary Samla  Sikairi Dkhar kynthup ia ki Executive Member.

Ha kane ka sngi la ioh ban pynkup burom ia ki khynnah skul da ka “4th U Woh Tep Kyndait Memorial Academic Award” kiba dei na ka thaiñ Mookhep, Wapungskur, Wapung Shnong, Tuber Kmai Shnong, Tuber Shohshrieh. Ki la don haduh 39 ngut kiba ioh ia kane ka Khusnam bad kynthup ia lai ngut ki samla ba la ioh ba mihkhmat ia ka jylla sha ka National Level Football Tournament .