Ki Samla ki dei ka jingdon jingem kaba khraw tam ka jylla, ong u CM ka Meghalaya

Syllad | The Rising MeghalayaOctober 20, 2023

U Myntri Rangbah ka jylla u Conrad K Sangma haka sngi Palei u la ong ba ki samla ki dei ka jingdon jingem kaba khraw tam ka jylla bad na ka liang ka sorkar ka don ia ka jingmut kaba skhem ban pynthikna na ka bynta ban saindur ia ka lawei kaba shakhmat ka jingim jong ki.

Ia kane u CM u la pynpaw haba kren ha ka jingrakhe ba lai sngi kynthih ia ka dap 50 snem ne ka ‘Golden Jubilee’ jong ka Meghalaya Board of School Education (MBoSE) ia kaba la pynkut noh hynne ka sngi ha ka jingiadon lang u Myntri ka Tnat pule puthi u Rakkam A Sangma, u Chief Secretary ka jylla u D.P Wahlang nalor kiwei pat ki riew pawkhmat bad ki heh sorkar.

U Conrad u la ong; “Ka dei ka kamram jong ka sorkar ban pynthikna ban phaikhmat kyrpang sha ki samla lyngba kaei kaba ngi pyrshang ban khmih na ka bynta ka jylla ka jong ngi..hateng ka sorkar ka la pynleit jingmut palat ha kaba iadei ka jingsam ia ki skhim.Kane ka sienjam ka dei ka lynti kaba khim jong ka sorkar namar haba phai sha ki skhim kal ong ba phi kwah tang ban pyntrei ia ki, hynrei phim sngewthuh halor ka jingmut ha kaba pyntreikam ia ka. Hynrei, mynta ngi la buh ia ki samla hakhmat eh bad ban shim ia ka rai.”

Nalor kata u la ong ruh ba ka dei ka kamram jong baroh ki kynhun kiba don bynta ban shim ia la ka jong ka bynta ban pynthikna ban jingsain dur bad ialam lynti ia  ki samla ba kin long kiba seisoh, ka jingkut jingmut, ka jingieid ri, ka jinglong dicipline bad kiba sheptieng ia u Blei.

“Ka Meghalaya ka dei ka Jylla kaba rit haba nujor bad kiwei pat ki Jylla hapoh ka Ri kum ka Uttar Pradesh, kumta, khnang ba ka Jylla kan poi ha kliar jong ka jingjop bad ka roi ka par, ngi hap ban pynthikna ba ngin lah pynmih ia ki nongshong shnong kiba shemphang khnang ba kin lah ban noh synniang sha ka roi ka par jong ka Jylla” ong u CM da kaba pynpaw ruh ia ka thong jong ka Jylla ban long kawei napdeng ki 10 tylli ki jylla ba hakhieh eh hapoh ka Ri.

Na ka liang u Myntri u la ai burom ruh ia ki  jingnoh synniang jong ki nongialam barim ka jylla kiba wat hapdeng shibun ki jingeh ki la lah ban sdang ban pynwandur ia ka board ha u snem 1973, kata ha ka por ba ka jylla ka dang shu mih thymmai hadien ka jingphiah na ka Assam.

 “Nga kwah ban ai burom ia baroh ki nongialam jong ngi kiba la len lade bad trei borbah ban shim ia ki rai hapdeng kiba bun ki jingeh bad ka jingduna kiba bun ha kitei ki snem kiba la leit noh na ka bynta ban pynurlong ia ka MBoSE kaba la kot mynta sha une u mawmer uba 50 snem kynthih,” ong shuh shuh u CM.

Katba na ka liang u Bah DP Wahlang CS ka jylla ha ka jingkren u la ong ba ka jingdon ki briew bala nang pule ba thoh (literacy rate) ha Jylla kala kiew na ka 24.49% sha ka 80% kata naduh kaba sdang kat haduh mynta, bad ka jingkiew ha ka jingdon ki jaka pule na ka 40-50 tylli sha ka 2923 tylli ki skul kiba la iasoh bad ka MBoSE ha kaba 1816 ki dei ki skul Secondary bad 421 ki dei ki Higher Secondary School.

Kiwei pat kiba la ai jingkren ha kane ka sngi ki kynthup ia u Myntri ka tnad Pule Puthi Rakkam A Sangma bad kiwei kiwei.