Ki shipai bala shongthait ki dei ban shim kabu na ki skhim sorkar Jylla: MP Tura

Syllad | The Rising MeghalayaDecember 13, 2023

Ka Headquarters 101 Area, Indian Army bad Rajya Sainik Board haka 12 tarik Nohprah kila pynlong ia ka Ex Servicemen (ESM) Rally ha Tura ia kaba la wan ban iashim bynta da ki shipai kiba la shongthait bad ki kurim jong ki shipai kiba la khlad noh ha ka jingiadon ryngkat lang ka MP Lok Sabha na Tura ka Agatha K Sangma kum ka Kongsan.

Haba kren ha ka jingialang ka Agatha ka la pyrto ia ka jingshakri jong ka tnat shipai. Ka la ong ruh ba kiba bun na ki dkhot jong kane ka tnat ki la shongthait ha ka rta kaba dang khynnah bad na ka liang ka sorkar ka la plie lad lyngba kiba bun ki skhim ka sorkar jylla kum ka CM Elevate and Promotion bad Incubation of Market Driven Enterprises (PRIME) ha kaba kine ki shipai ki lah ban pyndonkam ia ki sap ki jong ki ha kaba sengkam sengjam.

Nalor kata ka la ong ruh ba ka sorkar jylla ka dang iai bteng ban wad ia ki lad ki lynti ban tei ia ka skul shipai ne Sainik School ha ka jylla.Ha kajuh ka por ka la ai khublei ruh ia ka jingtrei shitom jong ka 58 Gorkha Training Centre bad ia ka Assam Regiment Centre ban pynthikna bad ki shipai kiba la shongthait kin ioh ia ka bai bam tymmen.

Na ka liang u Colonel Gautam Rai uba dei u Director jong ka Rajya Sainik Board Meghalaya ha ka jingkren ula ong ba la pynlong ia kane ka rally ha Tura da ka jingthmu ban shimkhia halor ki jingeh jong ki shipai kiba la shongthait na ka kam bad ia kiba haiing hasem jong ki kiba shong ba sah ha ka thain rilum Garo. Nalor kata u la pynthikna ba ka dei ka kamram ka jong u ban ai ka jingkyrshan ia ki shipai kiba la shongthait bad kiba haiing hasem khnang ba kin lait na ki jingeh.

Ha kane ka rally la wan ban iashim bynta da ki shipai kiba la shongthait, ki kurim jong ki shipai kiba la khlad noh bad la buh ruh ia ki Unit Run Canteen Counter, Medical Camp bad Grievance Cells da ka Ex-Servicemen Contributory Health Scheme (ECHS), Zilla Sainik Board (ZSB) bad ICICI.

Shuh shuh ha kane ka rally la shimkhia ruh ha kaba iadei bad ka bai bam tymmen bad SPARSH (System for Pension Administration (Raksha) bad la ai jingbatai bniah ruh ha kaba iadei bad ka ECHS, Army Welfare and Education Society (AWES) bad halor kiwei kiwei pat ki bynta.

Kiba bun heh ophisar na ka tnat shipai kiba la rim bad kiwei pat na heh sorkar ki la wan ban iashim bynta ha kane ka rally.