Ki shnong ki ju pyrshah ia ki projek pynlang jaboh ioh kylla kum ka Marten: Justice Thangkhiew

Syllad | The Rising MeghalayaJuly 22, 2024

Kiba bun ki shnong ki ju pyrshah bunsien ia ki projek pynlang jaboh (solid waste) namar ba ki tieng ba ioh kan pynkylla ia ka jaka jong ki sha ka jaka bret niut, kumba long ka ha nongbah Shillong, ong u Justice HS Thangkhiew, Nongbishar ka Iingbishar High Court of Meghalaya bad Executive Chairman ka MSLSA haba aijingkren kum u Kongsan ha ka prokram ba la pynlong da ka District Legal Services Authority (DLSA), West Jaiñtia Hills District ha ka 20 tarik mynta u bnai.

Watla katta u Justice Thangkhiew u la ong ba ki rukom pynbha ia ka jingpyniaid ia ki jaboh jabaiñ ki lah ban pynduna ia kine ki jingeh bad ki jingsyier hapdeng ki nongshong shnong. U la ban jur ruh ia ka jingdonkam ban pynsngewthuh bad pynshai ia ki paidbah ban pynthikna ba ia ki jingtyrwa na ka bynta ka jingpyniaid ia ki jaboh la bishar bniah bad kynthup ia ka jingiashim bynta lang jong ki paidbah.

Ha kane ka prokram ba la pynlong hapoh ka conference hall jong ka District and Sessions Court, Khliehtyrshi halor ka mat “Environmental Protection with a Special Focus on Solid Waste Management.” U Kongsan uba la pynpaw halor ka jingdonkam ban pynlong ia kiba kum kine ki prokram u la ong ruh ba kane ka prokram ka thew halor ki artylli ki bynta kiba iadei bad ka mariang bad ka jingpynkut noh ia ki jingmukutduma ba la slem bah kiba iadei bad ki kam shim jaka.

U la ong ba ka jaka ne khyndew ka dei ka jingdon jingem kaba neh bad kordor na ka bynta ki briew, bad ka jingkiew dor bad ka jingbanbor ka nang jur na ka bynta ban ioh jaka puta. Ka ain kaba rim kam shym la pynleit jingmut bha ia kine ki mat, hynrei la lah ban pynbeit ha ki ain kiba thymmai. U la ban jur ia ka jingdonkam ban pynbeit ha ka por kaba biang ban lait na ka jinghiar dor jong ka bai lutksan katba nang iaid ki sngi ki por.

Nalor kata u la ai ka jingiaroh ia ka DLSA halor kane ka porkram kaba kdew ia ka jingkongsan jong ka jingdonkam ban pynbeit kaba shabar jong ka iingbishar lyngba ka jingiapynbeit bad jingiakren. U la pynpaw ia ka jingkyrmen ba yn sa lah ban pynbeit shuh shuh ia ki mukotduma ha kane ka rukom bad ba ki mat ba la pynshong nongrim ki lah ban ym wan sha ka iingbishar.

Halor ka phang kaba iadei bad ka jingpynneh pynsah ia ka mariang, u Justice Thangkhiew u la kdew ia ka jingkiew ha ki kam pynshai paidbah halor ki bynta kiba iadei bad ma mariang. U la kdew ruh ia ka jingdonkam jong ka jingpyniaid ia ki jaboh jabaiñ bad ki niut ki nier khamtam ha ki jaka lum kum ha Jowai, ha kaba ka prokram ka long kaba iahap bha. U la ong ba ka sor Jowai ka la mad ia ki jingeh kaba khraw ha kaba iadei bad ki sienjam ban shim halor ki jaboh jabain, bad kane ka prokram ka dei kaba biang eh namar ka pynbeit ym tang ia ki jingeh ban tehlakam ia ki jaboh jabain hynrei ruh ia kiwei pat ki jingeh kiba ki thain jaka lum ki iakynduh.

Katba u Symbud Kongsan u Justice W Diengdoh Nongbishar ka Iingbishar High Court of Meghalaya bad Chairman ka HCLSC ha ka jingkren u la iathuh ia ka jingshem jong u halor ka mukotduma shim jaka kaba la slem kaba dei naduh ka snem 2002. U la pynkynmaw ia ka por jong u kum u ophisar bishar ba kyrpang uba pyniaid ia kine ki kam bad u la pynpaw ia ka jinglyngngoh ia ka jinglong ba jylliew bad ka jingjlan jong ka mukotduma. Hynrei u la sngewkmen ban iohi ba ka mukotduma ka la kut noh hapdeng ka jingseisoh bad u la ai khublei ia ka jingpyrshang jong baroh ki ophisar bishar kiba donkti, khamtam eh ia u paralok jong u uba la pynkut ia ka kam.

Ha kane ka jingialang la sam ruh ia ki cheque sha ki 144 ngut ki nongioh jingmyntoi na ka thaiñ Saphai na ka bynta ki mukotduma shim jaka ba la dep pynbeit da u Kongsan bad kiwei kiwei ki riew pawkhmat. Ka jingsiew bai lutksan ba la pynbeit da ka NEEPCO, Shillong, ha kaba iadei bad baroh 144 tylli ki mukotduma shim jaka ka long T. 1,03,08,108.50.

Kane ka jingpynbeit ka long halor ka hukum ba la pynmih ha ka 02-06-2023, ba la mynjur da u NA Khan, Special Judicial Officer (Land Acquisition), West Jaiñtia Hills District, Jowai katkum ka L.A. No. 26/2015. Ia ki 144 tylli ki mukotduma la pynbeit da ka jingsiew bai lutksan kaba la pynkiew (enhanced compensation amount), kaba kham heh da 50% ia ka pisa kaba la siew mynshwa da ka NEEPCO, Shillong.

Hadien la pynbud da ka Technical Session, ha kaba la don lang ki Expert Resource Persons, ki nongmihkhmat na ka Meghalaya State Pollution Board, u Capacity Building Specialist PMU, SBM (U), bad u Chairman jong ka Meghalaya Greentech Foundation. Ka jingialang ka la ai ia ki jingshemphang kiba kordor shaphang ki rukom pynbha ia ki rukom pyniaid ia ki jaboh jabaiñ bad ki jingmyntoi jong ka jingdonkti jong ki paidbah ha kum kine ki projek.

Ha kane ka prokram la ia don lang ruh u NA. Khan, District and Sessions Judge cum Chairman ka District Legal Services Authority, West Jaintia Hills, Deputy Commissioner, West Jaintia Hills Bah BS Sohliya bad kiwei kiwei.