Ki Shynrong Ka Ïing Duwan

Emlangmi SupuhAugust 1, 2020

Hadien ba ka WHO kala pynbna ba u khñiang Novel Corona u lah ban ïabit sha kiwei pat lyngba kaba jyrhoh ne synriah bad kumjuh lyngba kaba ktah ïa ki tiar ne ki mar ba lah ktah da kiba don une u khñiang; ka sorkar kala pynbna ba dei ban khang ïa ka jingïalum paidbah kynthup ki Ïing Mane-Ïing Duwan ban ïada na ka jingpurstet jong une u khñiang. Hadien bala khang ïa ki Ïing Mane, ki Balang kila wad ki lad ki lynti; kumno? ban bsa ’tien Blei ia ki ’riewngeit kiba don ha ki ïing ki sem jong ki. Ai nguh ïa U Blei ba lyngba ki kor ki bor internet ki Balang ki la lah ban ’bsa tien Blei ïa ki ’riewngeit. Kumba long mynta kiba bun ki Balang kila leh da ka Online Service khamtam ha ka sngi U Blei khnang ba ki bangeit kin ïoh ban peit ïa ki jingïaseng kiba wan sha ki ha ki mobile phone bad ki television da ka jingngeit ba ki bangeit ki ïa shim bynta lang na ki ïing ki sem jong ki.

Katkum ka jinglong jingman bad jingkylla jong ka por ka rukom treikam bad ka pyrkhat pyrdaiñ ruh ka kylla, mynshwa ngi pyrkhat ban hikai Ktien Blei ka dei tang lyngba hapoh ki  Ïing Mane lane ha ki rympei ïing. Hynrei mynta; ki nongialam ki peit pyrman bad ki ïohi ba ka por kala ih ba ki Balang ki dei ban pyndonkam ïa kine ki kor ki bor jong ka juk stad saian na ka bynta ban nang pynbha ïa ka rukom ai jingshakri sha ki khun ka Balang. Ngi shem mynta ki bangeit ki don la ki jong ki Mobile Phone bad baroh baroh ki pyndonkam ïa ka kor internet bad ki ïalum ha ki sites bad ki link jong ka Social Media. Namarkata, na ka bynta ban tei ïa ka jingïajan hapdeng kiba ngeit bad ki Balang, donkam shibun eh ban don ki jingshakri lyngba ki online khnang ba ka jingshakri kan poi sha ka jaka ba kiba bun ki ïalum. Kane ka jingshakri lyngba ki online ka iarap ruh kumjuh ïa kito kiba pang ba shitom (sick) kiba don ka jingshitom ha ki dkhot met (physically challenge) kito ki bangeit kiba don ha ki Ri ba pyrkhing (persecuted country) bad kumjuh ha ka por jong ka jingkhangdam (lockdown). 

Ka khlam Covid-19 ka pynpeit mat ïa kiba bun ki Balang Khristan hapoh ka Bri U Hynñiew Trep haduh ba kila lah ban pyndonkam ïa ki kor ki bor internet ha ka jingshakri Blei lyngba ki jingmane online; naduh ki Jingïaseng Balang, Jingïaseng Kynthei, Jingïaseng Samla bad jingïaseng Khynnah bad kine ki jingmane online kila poi lut sha ki jaka baroh lyngba ki social media. Ha kaba ïa dei bad ki khyllung-khynnah ngi isynei ban iohi ba ki hap ban shong ha ïing bad buhrieh ïalade (Isolation), kila duh noh ban leit skul, ban ia kynduh paralok, ban ialehkai bad ki paralok ha skul bad ha ki ïing mane, kane ka ktah shisha ïa ka pyrkhat pyrdaiñ jong ki. Hynrei, da kaba don ki jingïaseng online ki khynnah ki la ïoh lad ban ïohi biang ïa ki paralok jong ki kiba ki ju ïa kynduh barabor ha ki jingïaseng khynnah, kila ioh ruh ban peit ïa ki jingialehkai bad kiwei kiwei ki jait program kiba ïarap ïa ki ba kin heh kin san ha ka pyrkhat pyrdaiñ bad ka jingtip ïa U Blei.

Haba phai pat sha kawei ka bynta jong ka thwei pyrkhat, kaba ïa dei bad ka Online Service.

Ngi sheptieng pat ba hadien bala wai ka khlam lane hadien bala shah biang ban plie ïa ki Ïing Mane ban shakrilang, ïoh kin wan ki jingkylla ha ka rukom Mane Blei, ïoh lehse kiba ngeit ki sngewbit sngewbiang tang ha ki Online Service bad kin kyntait ban wan sha ki jingshakri lang. Mynta lyngba ki jingkynthoh/comments ha ki Social Media ngi ïohi ba kiba bun ki ong; kam lei lei lada ngim wan sha ki jingshakri lang lane ki Ïing Mane ruh namar da shakri hangno hangno ka biang hi bad ka jingshakri kaba shisha ka dei ha ka dohnud bad ka mynsiem. Hooid kata ka lah ban long kaba shisha, hynrei ka long pat kumba kylli; hato lah ban long khristan khlem leit Ïingmane? Ka jubab ka long hooid, tangba ka long noh kum: U khynnah skul u bym leit skul, u shipai ba khlem tur thma, u nong shongshnong bym thep vote, u nongthoh khlem nongpule bad ka sim ba khlem skum. Ngi sakhi mynta ba ha ki liang baroh ki kor ki bor technology kila mih bujli ïa ki briew, kalong kumjuh ha ka jingshakri, namar kata ngi ïoh sngew ba sha ki Ri sepngi ki Ïing Mane ki kylla long tang ki jaka mane jong ki tymmen ki san katba ki samla pat ki wan tang teng teng, ki ong ba ka Cyber Church ka long kham bit kham biang ban ia kaba shakri lang hapoh ki Ïing Mane Ïing Duwan. Lada kan wan jia long kumta ha ka Ri Khasi baieit jong ngi, kan sa ktah ïa ka nongrim jong ka Balang; namar ka pdeng jong ka Balang ka dei ka mynsiem jong ka jingiakynduhlang ka jingmanelang kaba marmet markhmat hapdeng ki dkhot jong ka. 

Dei ha kaba kum kane ka thwei pyrkhat nga poi kynmaw ïa kawei ka khana kaba thoh ha ka kot ‘Phawer U Aesop’ ïa kaba la pynkylla ktien da U Soso Tham shaphang “U NONGPDEM SNIEH BAD U MYNTRI.” Ha kaba u Soso Tham u la buh ruh ia ki kyntien jingsneng na kane ka khana kaba ong “YNDA LA MLIEN LA MYLLEN”. To ngin kynmaw ba kaba shakri hapoh ki Ïing Mane ka long pher na kaba shakri lyngba ki kor ki bor internet bad ba kine ki kor kin ym lah ban wanrah ïa ka mynsiem jong ka jingieit, jingtylli bad jinglong kawei jong kiba ngeit. U nongrwai shem mynsiem u ong, “Ka jinglong shitylli ki khun jong U Blei ka pynpaw ka burom U Khrist ha pyrthei” shuh shuh u ong “hapoh kane ka Ïing pynshong, jingieit jingsuk ba khuid; hangne pynkhiah dohnud bamong, pynjem pisa jingmut.” (KHB No.142,149). U Blei ruh U ñiew kyntang ia ka jingshakri jingïamane lang ha ka Ïing Kyntang jong U. Ka jingrwai Psalm kaba 133 ka ong, ‘ha khmih kaba bha bad kaba itynnad katno ba ki para ki ïa shong lang ha kaba ïa snoh kawei’, shuh shuh u Paul sha ki Hebru 10:25 u ong ‘to ngin ïa kyntu paralok khlem da iehnoh ïa ka jingïasenglang jong ngi kumba long ka rukom ïa kiwei, khamtam katba phi ïohi ïa kata ka sngi ba ka nang jan.’

Jingpynkut Nia: La tei khnang ïa ki Ïing Mane na ka bynta ban ïa syllok lang bad ban mane lang ïa U Blei. Ki bangeit kin ym lah ban san khlem ka jingïasenglang bad khlem ka jingshakri lang ka jingim khristan kam long kaba dap pura. Ki bangeit ki lah ban don ha ki jingiaseng online na ki daw bymlah kiar hynrei haba ka plie ka lad ban wan sha ki jingiasenglang, ngim dei ban ong em ne thait bad ngim dei ruh ban kylla myllen tang ha kaba shakri lyngba ki online. Hooid ki kor ki bor internet ki long shisha ka jingkyrkhu kaba khraw ïa ki Balang namar dei lyngba kine ki kor la lah ban pynher stet ïa ka khubor ba bha u blei lyngba U Jisu Khrist sha ka pyrthei baroh kawei, kine ki kor ki ïarap ruh ha kaba treikam treijam bad ha kiba bun ki bynta. Nga sngew dei ban ong ki Balang kiba kot bor ki dei ban shim ïa ka jingkitkhlieh ha ka ban pyndonkam ïa kine ki kor na ka bynta ban pyndonburom ïa U Blei. Wat hapdeng kine ki jingmyntoi ba ki kor ki bor internet ki iarap, to ngin kynmaw kyndiang ba ngi dei ki Shynrong jong ka Ïing Duwan, Kumba ki shynrong ïing ki donkam ban ïadait iwei ïa iwei ban pynskhem ïa ka ïing, ka long ha kajuh ka rukom ba ki shynrong ba shisha jong ka Ïing Duwan ki dei don ka jingïakynduh lang; kane ka ïarap ban long ki shynrong kiba skhem bad ba neh, khnang ba ka Ïing Duwan kan ïai long ka jaka kaba im.

To u Blei Trai Kynrad Nongbuh Nongthaw un theh sei ïa ki umjer jingkyrkhu ha phi ki nongpule baieit baroh da kaba ngi kyrmen skhem ba kane ka khlam kan kut kan jah junom na ka jylla jong ngi bad na snieh ka sla pyrthei hi baroh kawei lyngba ka jingisynei bad jingieit ba neh bymjukut jong U.