Ki skhim sorkar pdeng kiba kyntiew iaka ioh ka kot ki shnong nongkyndong bud iaki jingbthah ban roi ban par: Metbah Lyngdoh

Syllad | The Rising MeghalayaSeptember 27, 2021

Kum shibynta ban bteng ia ka jingpynshai paidbah halor ka khlam COVID-19 bad halor ka tika iada na kane ka khlam bad ki skim sorkar pdeng, ka ophis jong u Block Development Officer ka Mairang C&RD Block ka la pynlong ia ka prokram pynshai paidbah ha phyllaw jong ka Laitdom Presbyterian Secondary School, Laitdom Mawlieh, Laitdom haka sngi Nyngkong.

U Lamphang ka iingdorbar thawain jong ka Meghalaya Legislative Assembly ula long kum u kongsan ha ka jingdon ryngkat u BDO ka Mairang C&RD Block u Bah V. Swer, ki nongtrei jong ki tnat sorkar bapher bapher, ki Sordar shnong ka thain, ki nongialam niam bad kiwei pat.

Ha kane ka prokram la ioh ruh ka jingpynshai paidbah na ka liang jong u BDO ka Mairang C&RD Block bad kiwei de ki ophisar halor ki skhim pynroi bapher bapher jong ka sorkar kmie kum ka PMAY, NRLM, MNREGS, DDU-GKY nalor kiwei kiwei.

U Lamphang ka iing Dorbar thawain ka jylla uba long ruh u MLA Mairang u Bah Metbah Lyngdoh haba kren u la ong ba ki skhim pynroi bapher bapher jong ka Sorkar Kmie kiba kynthup ia ka MNREGS ki la iarap shikatdei eh ban kyntiew ia ka ioh ka kot jong ki paidbah nongshong shnong ka Ri khamtam kito kiba sah ha ki thain nongkyndong. Ula la kyntu ruh ia ki paidbah bad ki nongialam shnong ba kin bud ryntih ia baroh ki jingbthah kiba thymmai halor ka rukom pyntreikam ia kine ki skhim namar ka jingthmu hi ka long ban kham pynjanai shuh shuh ia ka rukom pyntreikam iaki naka bynta ka jingbit jingbiang bad jingmyntoi u paidbah.

Haba iadei bad ka jingpang khlam COVID-19, u Bah Metbah u la pynkynmaw ia ka jingiatrei shitrhem ki nongshongshnong jong ka jylla ha ka kylla kaba nyngkong jong kane ka khlam ha u snem bala leit noh bad u la kyntu ruh ia ki paidbah ba kin iai bteng ban husiar da kaba bud pyrkhing ia baroh ki jingbthah jong ka sorkar ha kaba iadei bad ki lad jingiada na ka jingsaphriang jong kane ka khlam ha kane ka wat kaba mynta bad ban iai bteng ban ai jingkyrshan ia ki nongtrei jong ki tnat sorkar bapher bapher ha ka jingpyrshang jongki ban iada na ka jingsaphriang shuh shuh jong kane ka khlam ha ka ri bad ka jylla.

U Bah Metbah u la kyntu ruh ia ki paidbah nongshong shnong ba kin ym sngap ia ki khubor lamler bad ki khubor bym dei namar kine ki don ia ka bor ban ialam bakla iaki paidbah bad kiba lah ruh ban long ki mawjynthut pynban ia ka jingiakhun pyrshah ia ka khlam COVID-19 da ki bor sorkar bad bor shnong bor thaw.

La pyniphuh iphieng ia kane ka prokram da ka Skit halor ka phang “Iada iala ki khun na u khniang COVID-19” ia kaba la pyni da ki nongtrei ka koit ka khiah jong ka PHC Laitdom bad ki nongshongshnong ka thain bad ia kiba la btin lynti da ka Dr Anita kaba la wan na ka liang jong ka World Health Organization (WHO).

Kiwei kiwei pat kiba la kren ha kane ka prokram ki kynthup ia u BDO ka Mairang C&RD Block u Bah V. Swer, u Bah Andrew Sawian uba la mihkhmat ia ka Indian Red Cross Society, u District Programme Manager, DDU-GKY, Nongstoin, u Bah B. Marbaniang, u Medical Officer ka PHC, Laitdom u Dr. N. L Mawnai bad  u Sordar Shnong ka Shnong Laitdom Mawlieh u Bah H. Lawriniang.

Hadien ba la wai ka prokram la sakhi ruh ia ka jingaitika iada COVID-19 ha katei ka jaka ha kaba la pynlong ia ka prokram. SDPRO | Mairang