Ki trai muluk kim don jaka puta bad mad ia ka jingduk, ong u kyrtong KHNAM

Syllad | The Rising MeghalayaJanuary 28, 2025

U kyrtong ka Khun Hynniewtrep National Awakening Movement (KHNAM) na Laitumkhrah-Malki Constituency, u Bah Peter Shallam u la ban jur halor ka jingdonkam ia ka Khasi Hills Autonomous District Council (KHADC) ban weng ia ki jingeh halor ka jingbym don jaka puta bad ka jingduk jingkyrduh hapdeng ki nongshong shnong ha ki thain nongkyndong bad halor ka jingpynjulor ia ka mariang. 

Haba kren sha ki lad pathai khubor hynne ka sngi 28 tarik Kyllalyngkot hadien ba la pyndep ia ka jingthep kyrteng na ka bynta ka elekshon MDC sha ka KHADC ka ban long ha ka 21 tarik Rymphang, u Bah Shallam u la ong, “Ngi donkam ban shimkhia ia ka elekshon MDC. Ngi donkam ban phaikhmat sha ki thain nongkyndong ha kaba bun na ki briew ki la nang shah ktah jur ha ka jingduk jingkyrduh bad ka jingeh na ka jingbym don jaka puta.”

Haba pynpaw ba ka kam tih par bad tih maw tih shyiap ki la ktah jur ia ka mei mariang, une u kyrtong ka KHNAM u la ong, “Namar kata lyngba ka KHADC ngi dei ban pynkhie im bad pynthymmai ia ki tyllong um bad ka jinglong jingman jong ka mariang.”

U la bynrap ruh da kaba ong, “Haduh palat 749 tylli ki tyllong um kumba ngi tip ki don hapdeng ka jingma kaba khraw na ka jinglah ban jah rngai noh. Kumta ka bynta jong ka KHADC ka long kaba kongsan bha halor kane ka bynta.

U Bah Peter u la buh jingkylli ruh halor ka jingpulom jong ki Executive Committee ka KHADC kiba la leit noh ban jubab ia ki jingkylli jong ka tnad kam pohiing halor ka Village Administration Bill (VAB), 2014.

“Ki Rangbah Shnong ki la treikam da kaba pynshong nongrim halor ki kyndon ain bapher bapher namar kam don kajuh ka ain bad kane ka la ktah jur ia ka rukom synshar ia ki shnong ki thaw,” u la bynrap.

Ha kajuh ka por u Bah Shallam u la ban jur halor ka jingdonkam ban pynkylla ia ka United Khasi Jaintia Autonomous District (Appointment and Succession of Chiefs & Headmen) Act, 1959 bad ong, “Kum ka nuksa ha Ribhoi ki nongsynshar shnong ki shim kabu da kaba shim da ka pisa kaba heh bha ha ki kam iadie iathied jaka.Kane ka ktah jur ia ki briew kiba thied jaka na ka bynta ban rep ban riang. Kumta ka dei kaba dokam kyrkieh ia ka KHADC ba kan pynkhie im ia kane ka Act 1959.”