Ki Training ki dei ban ïarap kyntiew ïa ka ïoh ka kot ki nongrep: Garod

Syllad | The Rising MeghalayaMay 17, 2022

U Deputy Commissioner jong ka West Jañtia Hills District haka jingkren jong u ha ka jingïalang ban plie ïa ka training ha ka shnong Sohmynting, ula ong ba ki training kiba kum kine ki dei ban ïarap ban kyntiew ïa ka ïoh ka kot jong ki nongshim bynta ha ka training.

Kane ka training kaba la sdang haka sngi Nyngkong ka dei kaba la pynlong da ka Society for Urban and Rural Enpwowerment (SURE) bad kaba la kyrshan pisa da ka Meghalaya State Skill Development Society kaba hap hapoh ka tnat Labour jong ka Sorkar Meghalaya.

Ka phang jong kane ka jingai jinghikai ka dei halor integrated farming ne ban hikai halor ban rep bad ban ri bunjait ha ka juh ka jaka rep.

U Deputy Commissioner Garod L.S.N Dykes haba kren shuh shuh kum u kongsan ula ong ka sorkar kala ïaleh ban wanrah ïa ki training ha ki shnong hi jong ki nongrep ban pynsuk ïa ki, kumta ula kyntu ruh ïa ki nongwan shah hikai ba ki dei ban pyndonkam hok ïa kaei kaba ki la ïoh jinghikai. Nalor kata ula ong ruh ba ki paid nongkyndong ki dei ban shim ïa ki jingïarap kiba ka sorkar ba ki dei kiba ïasnoh kawei bad kawei pat. Kum ka nuksa u ong ba kane ka training ka don ka jingïasnoh bad ki SHG kiba trei ïa ki kam kiba bun khamtam ka kam rep. Kumjuh ruh ki Producer Group kiba don haka shnong kiba ka kam kaba ki trei ka dei ka kam ri sniang bad ka kam rep jhur, kin ïoh jingïarap shikatdei eh na kane ka training ha ka kam integrated farming.

Ha kane ka sngi la ïoh jingkren ruh na u ma Lephing Pyrtuh uba long u Waheh Chnong jong ka shnong Sohmynting uba la ai ruh ïa ka kaiphod ha u DC ïa ka jingtreikam jong ka VNRMC kaba la leh shibun ki kam ha kane ka shnong ban pynneh pynsah ïa ka mariang bad kaba ker sawdong sawkun.

U ma Lambormi Suchen uba long u Skill Development Officer jong ka West Jañtia hills district ula pynshai ba kane ka training ka dei ka bynta jong ka Skill Mission kaba ka thong jong ka ka long ban ai training ïa ki shilak ngut ki nongshong shnong ha ki san snem. Ula ong ruh ba ha kane ka snem ka thong ka long ban ai training ar phew hajar ngut ki nongshong shnong hashwa ban kut kane ka snem.

U Dr HH Mohrmen haka jingkren waiphang jong u, ula ong ba ka jingkhmih lynti ka long ba ki nongrep hadien ba kila pyndep ïa kane ka training kin lah ban nang pynbha ïa ka rukom ri jingri jong ki, kumjuh ruh ban shna sboh bad ban shna jingbam sniang da kaba pyndonkam da ki ñut kiba mih na ki mar kiba pyut. Kiwei pat ki nongkren ha kane ka jingïalang ki dei u ma Mynjur Lyngdoh Pyrtuh uba long ruh u Secretary jong ka shnong Sohmynting.

Lah ban pynkynmaw ba kane ka dei ka training kaba ar halor ka integrated farming kaba ka SURE kala pynlong bad kaba nyngkong ka dei haka shnong Ϊalong.