Kiba bun ki samla ki la pyniasoh sha ka HNLC kam u Sainkupar Nongtraw

Syllad | The Rising MeghalayaSeptember 21, 2023

Ka Seng kieng atiar Hynniewtrep National Liberation Council (HNLC) haka sngi Palei ka la kam ba kiba bun ki khynnah samla ki la wan ban pyniasoh sha ka seng bad pynkhreh ban pynkylla ia ka histori.

U General Secretary cum Publicity Secretary ka seng HNLC u Bah Sainkupar Nongtraw u la ong ruh “Ngi la shah pyniasoh da ka bor sha ka sorkar India lyngba ka jingshah pynbiej bad shah pynap suloi, hynrei ym da ka mon sngewbha. Ka jingthaw ia ka HNLC ka dei kaba la pynshong nongrim halor ki hok kiba katkum ka histori jong ka ri.”

Ia kane u Bah Sainkupar ula pynpaw shibynta ka jingrakhe ia ka sngi lenlade ne ka  ‘martyrs day’ kum ka jingithuh ia ki nongialam bad ki dkhot kiba la aiti ia la ka jong ka jingim ha ka jingiakhun pyrshah ia ka jingwan kurup jubor bad ki kam banbor jong ka sorkar India.

U la ong ruh ba u Bah Sambor Mawthoh ba ju khot Dengdeng u la ioh ia ka jaka kaba halor eh ha ka histori jong ka seng HNLC. Une u la duh noh iala ka jingim kum u dkhot ba nyngkong jong ka seng ha ka jingialeh pyrshah ia ki bor pulit ka Meghalaya ha ka 21 tarik u Nailur 1994 kaba la jia ha Jaiaw. Kum ka jingithuh ia ka jinglenlade ka jong u, ka seng HNLC ka la pynbna ia kane ka sngi kum ka ‘Martyrs’ Day’ jong ka Seng.

Nalor kata u la ong ruh ba ka Seng ka buh ia ki rekod jong baroh ki dkhot jong ka kumjuh ki nongialam kiba la aiti iala ka jong ka jingim ha ka jingialeh na ka bynta ka ri Hynniewtrep ne ‘Hynniewtrep Nation’. “Ka snam kaba tuid jong kine ki samla ba shlur kan ym lehnoei, namar ka HNLC ka don ia ka jingkut jingmut ban pynthikna ba ka jingialaeh ka jong ngi ka la kylla long ka bynta jong ka histori.

Une u nongialam ka Seng u la ong ruh ba ka jingkongsan jong kane ka sngi ka dei halor ka jingleh burom ia kine ki nongialam bad ki dkhot kiba la aiti iala ka jong ka jingim ha ka jingialeh pyrshah ia ka jingwan kurup beain bad ia ka jingbanbor jong ka sorkar India.Ka dei ka sngi ba kyrpang ban leh burom ia kito ki riewshlur kiba iakhun khlem jingsheptieng na ka bynta ki hok bad ki jingangnud da ki nongshong shnong ki jong ki.

U la ong ruh ba kane ka jingtrei shitrhem bad ka jinglen jong kine ki samla ka long kum ka sakhi halor ka jingkut jingmut ban pynioh ia ka hok bad ka jinglaitluid. “Ha kane ka sngi, ngi shim khyndiat ia ka por ban kynmaw kyrpang ia kane ka jinglenlade ka jong ki bad pynpaw ruh ka jingsngewnguh halor kane ka mynsiem shlur jong ki,” ong u Bah Sainkupar.

Shuh shuh ula ong ruh ba kim ju don satia kino kino ki jingialeh ki ba khlem ka jingmih snam ha ka histori jong ka pyrthei.Ha ka jingsngew ka jong u ba ki lynti jingiakhih ba jai jai (nonviolence) kin ym wan urlong lada ki nongbanbor kim don ia ka jingsngewlem.