Kiba kwah shim khaw rashon kin hap don Aadhaar card

Syllad | The Rising MeghalayaOctober 15, 2024

Ka office jong u Deputy Commissioner (Supply), West Jaintia Hills District ka la pynbna biang sha baroh ki dealer khaw ration ba katkum ka jingbthah jong ka Sorkar Government of India, Ministry of Consumer Affairs, Food & Public Distribution ki nongbam khaw ration kiba hap hapoh ka NFSA (AAY & PHH) ki hap ban shim khaw da ka ba pyndonkam da ka e-pos machine.

Ha kajuh ka por ka sorkar ka la pyntip ba ka lah ai por biang ban shondur Aadhaar na ka bynta ki nongbam khaw ration haduh ka 31st December (Nohprah), 2024.

Na ka liang jong ka office ka la kyrpad ia kito ki nongbam khaw ration baroh ki bym don Aadhaar, hynrei kiba dang kwah ban shim khaw ration ki hap ban leit shondur Aadhaar ha ka office jong u BDO (Laskein, Thadlaskein C&RD Block) lane Deputy Commissioner office, West Jaintia Hills District.