Kiba pyndonkam iaki khynnah hapoh 14 snem ban bylla kin shah pynsaja

Syllad | The Rising MeghalayaJune 13, 2022

Ka District Labour Office, West Jaintia Hills ryngkat ka jingiatreilang ka District Legal services Authority, West Jaintia Hills haka sngi Nyngkong kala rakhe iaka World Day Against Child Labour ne ka sngi pyrshah iaka jingpyntrei bylla iaki khynnah haka Skul All Saints CNI, Ladthadlaboh.

Kane ka sngi kyrpang ban pyrshah iaka jingpyntreibylla iaki khynnah la juh rakhe haka 12 tarik u Jylliew manla u snem.

Ka kong Bethcey Toi, Labour Inspector haba kren kala batai bniah shaphang ka aiñ Child & Adolescent Labour (Prohibition and Regulation) Act 1986 ba ka dei ka aiñ bala khang pyrshah ban pyntrei iaki khynnah hapoh 14 snem ka rta ha baroh ki jaid kam bad ia 14 haduh 18 snem ka rta iaki jaid kam ba ktah iaka koit ka khiah (Hazardous occupation). Kala ong ruh ba kino kino kiba pynkhein ia kane ka aiñ kin shah pynshitom da kaba shah set phatok kaba duna duh eh 6 bnai kaba lah ban pynjlan shaduh 2 snem da kaba siew ia kuna kaba T. 20,000/- haduh T. 50,000/-.

Ka kong M Nongtdu, Coordinator Childline kala batai shaphang ka jingtreikam ka Childline hakaban iarap iaki khynnah kiba mad jingeh lane kiba shah ieh bein bad lah ban pyntip sha Childline dakaba phone ha u number 1098. U Ma BM Lamare, Legal cum Probation Officer, District Child Protection Unit ula batai shaphang ka Protection of Children from Sexual Offences Act,2012 bad kyntu iaki khynnah skul ba ki dei ban husiar naki briew kiba shim kabu bad ruh ban kiar naka jingshongkha khynnah.

U Hameshaniah Suiam uwei na ki nongialehkai martial arts ne Kick Boxing uba long ruh u Para Legal Volunteer ula batai shaphang ki kam ba ki Para Legal Volunteer bad ki dei kiba nyngkong eh kiba lah ban iarap ia kino kino ki lanot kiba ia har rukom ki jingeh bad ki don ha man la ki shnong ki ban iarap iaki paidbah kakaba iadei bad ki aiñ bapher.

U Principal ka skul All Saints CNI, u Rev S Siangshai uba la ai khublei iaka District Labour Office bad District Legal services Authority, West Jaintia Hills kiba la pynlong iakane ka prokram bad ruh iaki nongkren na kiwei pat ki ophis kiba la ai jingbatai bniah kaba ai jingmyntoi iaki nonghikai bad khynnah skul. U R Lyngdoh, Legal Aid Counsel ula pyniaid ia kane ka jingialang.