Kiba pynieng kali ha ki jaka paidbah kim dei ban pynthud ia kiwei: Police

Syllad | The Rising MeghalayaFebruary 15, 2024

Ka iingbishar High Court ka Meghalaya ka la pynmih ia ka hukum katkum ka PIL No. 14 of 2023 Dt. 07.02.2024 na ka bynta ban pyrkhing ha kaba iadei bad ka jingpynhap ia ki tiar ne mar tei iing tei sem bad kiwei pat ki jingpyntrei lane ban leh ia kino kino ki jingtreikam ha ki lynti rud surok kiba pynthut shibun ia ka leit ka wan jong ki kali bad buh jingma ruh ia ka jingim jong ki riew paidbah kiba leit ba wan.

Kumjuh la pyrkhing ruh ha kaba iadei bad ka jingpynieng kali ha ki surok ha ka por mynmiet da ki trai ki bym don ia ki jaka set kiba biang ha ki jaka shong jaka sah jong ki khnang ba kan ym don ka jingpynthut halor ka hok kaba iadei bad lynti syngkien.

Ha kaba iadei bad kane na liang u Superintendent of Police, East Khasi Hills, u Bah S. Nongtnger IPS lyngba ka Tnat Shillong Traffic Police (STP) ka buh ka jingkyrpad ia ki paidbah ba kin bud beit ryntih ia kane ka hukum na ka bynta ka jingshngain na ka bynta kiwei pat kiba pyndonkam ia ki lynti surok kumjuh ia ki paidbah kiba iaid ba ieng.

Kano kano ka jingpynkhein ha kaba iadei bad kane ka hukum yn shim da ki sienjam kiba tyngeh bad yn pynngat ha ki kyndon katkum ka aiñ