Kiba shah kem kit tiar pynbthei kim dei na Raliang ong u Waheh Shnong

Syllad | The Rising MeghalayaJuly 24, 2020

Ka Dorbar Shnong Raliang kala pynshai paidbah ba ki briew kiba shah kem ha ki Pulit Raliang Out Post halor ka jingkit tiar pynbthei kim dei satia ki nongshong jong ka Raliang.

U Waheh Shnong Raliang ma Sanki Lamare ula ong ba ki briew kiba shah kem haka 19 tarik une u bnai kim dei satia nongshong jong ka Raliang kumba la paw haka khubor bad ki dei na ka shnong Iooksi Kyan Mynsar bad Priang.

Ka Dorbar Shnong Raliang haka 23 tarik une u bnai kala shong jingialang halor kane bad ka jingjia bad kurup tiar pynbthei ki Pulit Raliang Out Post.

Ka dorbar shnong kala maham ia kino kino kiba ai kyrteng ne pynmih kyrteng klumar iaka shnong Raliang ban lait ialam bakla iaki paidbah.

Shuh shuh ka shnong Raliang kala pymbna ba kam shah iaki briew kiba nabar shnong ban die jingdie da kaba leit tyrwa hapoh shnong poh thaw ha kum kane ka por ka saw ka saw ka sain na ka jingsar ka khlam COVID-19. Kino kino kiba rung shapoh shnong na ka bynta ki kam kyrkieh ki dei ban pyntip ban iaid lyngba ka bor shnong bad phone ha kine ki number:
Waheh Chnong- 8787602609
Secretary Chnong-6009438045
President VDP-9856202904

La kyntu iaki paidbah ban iatreilang ban tem iaka sniew ka smeh bad ka khlam COVID-19.

Kumban shu pynkynmaw ia kine ki tiar pynbthei la ioh kurup na kawei ka kali haka por ba khynra kali (Naka Checking) da ki pulit jong ka Raliang Outpost.

Ha kane ka jingjia saw ngut ki briew kila shah kem bad kurup ruh iaki tiar pynbthei na ka kali Bolero Pick Up ML 11 3432 kynthup iaki bakhor dynamite (Gelatin Stick) 4500 tylli, 4000 tylli ki tikli (Detonators) bad 4 top/drum umphniang diesel kaba 200 litre kawei.