Kiba shongkha khleh ha Sonapyrdi kin shah tait shnong

Syllad | The Rising MeghalayaAugust 26, 2019

KHLIEHRIAT: Ka Dorbar Shnong Sonapyrdi, Elaka Narpuh East Jaintia Hills District kala pyllait paidbah ïaka riti treikam jong ka shnong bad ha kane ka riti treikam kaba thymmai la mana bad maham ïa ki nongshong shnong ba kim bit ban ïa shongkha khleh bad ki bar jylla.

Ha kane ka riti synshar shnong ka Dorbar Shnong Sonapyrdi la maham ba kino kino kiba shongkha khleh kin ngat haka jingshah pynshitom haka dorbar shnong kaba ïaryngkat kyrdan bad ka jingshah tait shnong namar ba ba kin duh lut a baroh ki lad jingiarap na ka shnong, la ong u kyrwoh bala phah da u Daiapherbha Lamare, Secretary Shnong Sonapyrdi.

Ïa kane ka riti treikam jong jong ka Dorbar Shnong Sonapyrdi la pyllait paidbah da u ma Pirit Talang Waheh Shnong barim haka 22 tarik une u bnai haka jingïadonlang ki nongialam shnong bad ki dkhot shnong.

U Bah Pirit Talang ha ka jingai jingkren jong u, u la ong ba ki nongshong shnong baroh ki dei ban bud ia kane ka riti treikam ka shnong bad u la ong ruh ba ki dei ban iatreilang bad ki nongialam shnong khnang ba ka jingpyntreikam ia kane ka riti treikam kan long kaba jop bad kan long kaba suk ruh ha ka ban pyniaid ia ki rukom treikam jong ka shnong.

Ka Shnong Sonapyrdi ka don la ka jong ka riti treikam naduh u snem 2001 bad la pynkylla thymmai katkum ka jingiaid bad jingkylla ka por bad kadei ka shnong ba nyngkong eh hapoh ka Elaka Narpuh kaba don la ki jong ki Riti Treikam (Constitution) ban pyniaid shnong ban pynneh ïaka jinglong kyrpang ka Shnong ka thaw, ka Riti Dustur u Khasi (Khynriam, Pnar, Bhoi, War).