Kiba thmu pynlong Yatra bad khein Kmie ia ka Masi ki dei ki biej bad ki lehnoh, ong u Rakkam

Syllad | The Rising MeghalayaSeptember 17, 2024

U Myntri ka Tnad Pule puthi u Rakkam A Sangma ha ka 16 tarik Nailur u la ong ba ka kynhun kaba thmu ban pynlong ia ka jingialap khang bam doh Masi bad ban pynbna ia ka Masi kum ka Kmie jong ka Ri ki dei ki biej bad ia kiba dei ban khein kum ki kynhun lehnoh.

“Nga tharai kim long kiba bit ban long ki nong India. Kine ki briew kiba leh ia kine ki kam biria ne tamasa ki dei ki biej ki bym don jingtip shaphang ka jingsynshar jong ka Ri India, ka jingiapher ha ka kolshor bad halor ka hok katkum ka riti synshar khadar kaba shah laitluid ia ka jingngeit niam,” ong u Myntri haba kren sha ki lad pathai khubor haba jubab ia ka jingkylli halor ka jingthmu ban pynlong ia ka Yatra ialap khang bam doh Masi ha ka 2 tarik Risaw ha Shillong.

 Ia kane ka Yatra la pyrshah jur da jan baroh ki nongshong shnong ha Meghalaya. Ki la don ruh katto katne kiba byrthen ban pynlong da ka tamasa bam doh Masi lada ka sorkar Jylla kan aijingbit ia kane ka kynhun seng Hindu ka Jyotish Peethadheeshwar Shankaracharya Avimukteshwarandah ba kan pynlong ia kane ka Yatra.

Haba pynpaw ba haduh katno u bang ia ka doh Masi, u Rakkam u la ong, “Ki dei kiei ban wan batai ia kaei kaba dei ban bam bad kaei ka bym dei? Na ka bynta jong nga yn ym don mano mano ha ka pyrthei ki ban lah ban pynsangeh na kaba bam ia kino kino ki jingbam kiba nga sngewtynnad.” U la ong ruh ba ka jingbam ia ka doh Masi kam dei satia ban don ia kano kano ka jingpyniasoh bad kano kano ka niam.

Haba pynkynmaw ia ka jingiatai jong u Late PA Sangma hapoh Parliament ha ki snem 1987, une u Myntri u la ong, “U nongialam ba khraw jong ngi na ka thain Shatei Lammihngi (Northeast), u Late PA Sangma MP barim ka Tura u la iada ia ka hok ban bam katba mon ha India, da kaba ban jur ruh ia ka jingdonkam ban burom ia ki rukom im bapher bapher hapdeng ki nongshong shnong jng ka Ri.

Na ka liang ka sorkar Jylla ruh ka la ngat ha ka jingshah pynbor ha ki kynhun bapher bapher ba kam dei satia ban aijingbit ia kane ka kynhun Seng Hindu ba kan pynlong ia kane ka Yatra kaba thmu ban ialap bad ban khanglad halor ka jingpyniap ia ki Masi bad ban buh ruh ia ka Masi ha ka kyrdan kum ka Kmie.