Kiew 9 ngut kiba shah kem halor ka jingjia shah leh beijot ki khynnah kynthei ha SWGH

Syllad | The Rising MeghalayaApril 28, 2024

Da ka jingshah kem biang jong ki arngut, mynta ki la don baroh haduh khyndai ngut kiba la shah kem halor ka jingkynnoh donkti ha ka kam leh beijot kynhun pyrshah ia ki khynnah kynthei ba dang rit ha South West Garo Hill (SWGH), ong ka khubor pulit.

U Superintendent ka SWGH u Vikash Kumar u la ong, “Hadien ba la ioh ia ki jingtip ha kaba iadei bad ka jingjia shah rahbor, shah thombor, byrngem byrsit bad ka jingshah leh beijot kynhun jong ki khynnah kynthei ba dang rit ha Chenga Benga Mela kaba la jia ha ka 16 tarik mynta u bnai, kumta ruh na ka liang ki pulit ki la registar case bad iaid shakhmat ia ka jingtohkit.”

 U la ong ruh ba ki pulit lyngba ki sakhi satar kiba ki la lum na katei ka jaka ba la jia katei ka kam pyntriem bad lyngba ki jingphla jong kine ki khynnah bad lyngba ki medical report lem bad kiwei pat ki sakhi, ki la ioh ban kem noh haduh khyndai ngut ki suba donkti ha kane ka kam bymman kat haduh mynta.

Nalor kata u la ong ba baroh kine kiba la shah kem ki dei ki nongshong shnong jong ka shnong Teporpara (Assam) kaba don hajan ka jaka ba la jia katei ka kam pyntriem, bad ia kane ka jingioh kem la lah ban pynurlong lyngba ka jingiarap da ki bor pulit ka South Slamara district.

Ki pulit ki la ioh ruh ban kurup noh ia ki hynniew tylli ki mobile phone na kine ki briew kiba la shah kem bad ki dang pynlong ka jingjurip bniah ban lapksai shuh shuh halor kane ka jingjia.

Ha ka por ba pynlong ia ka jingtohkit, u SP u la ong la ioh jingtip ba kine ki runar ki la knieh noh ruh ia kawei ka mobile phone nauwei u briew byrthen bad dawa pisa ruh na uwei pat. Halor kane ka bynta ruh ki ulit ki la rejistar case bad sdang ban pynlong ia ka jingtohkit.

 “Ka jingtohkit halor baroh kine ki case ka la iaid shakhmat bad shen yn sa ioh ruh ba kem noh ia kiwei pat kiba shah kynnoh donkti,” ong u SP da kaba kyntu ruh ia ki nongshong shnong ba kin aijingtip sha ki pulit lada ki don jingtip ei ei ha kaba iadei bad kine ki runar kiba donkti ha kine ki kam pyntriem, ha kaba yn buhrieh ruh ia ki kyrteng jong ki nongai jingtip,” ong shuh shuh une u heh pulit.